TIRANË- Kryeministri Edi Rama ka vijuar sot rubrikën “Përgjigjja ime”, ku ka folur për shpërndarjen e librave falas. Ndërsa një komentuese i thotë Ramës se librat duhet të jenë falas deri sa të mbarojnë studimet, Rama thotë se nuk ka asgjë për turp, pasi vende të rajonit nuk shpërndajnë libra falas dhe as në botë.
Megjithatë ai premton se deri në fund të mandatit do të arrihet që librat të shpërndahen falas deri në fund të arsimit të detyrueshëm.
KOMUNIKIMI I KRYEMINISTRIT
Përgjigjja ime
Komentuesja: Turp i madh librat jepen falas o Z. Rama derisa fëmijët mbarojnë studimet. Skandaloze!
Edi Rama: Përshëndetje Alida por fjala e mirë nuk del dot meazallah. Deri sot librat e shkollës ishin të gjithë me pagesë, madje për vite e vite të tëra para se nisnim zbatimin e reformës rrënjësore të teksteve prindërit jo vetëm paguanin por blenin mall totalisht skarco, tekste me deformime, me gabime të pafundme mes1300 librash gjysma e të cilëve u refuzuan nga mësuesit. Ndërsa tani që librat me cilësi të padiskutueshme, të Cambridge, Oxford, pasi kanë zëvendësuar librat e Gabit të injorancës dhe korrupsionit bëhen falas për 190 mijë fëmijë jo vetëm s’të del fjala e mirë por të del fjala e madhe turp, madje jo turp dosido por turp i madh shkruan ti. Dhe sikur të mos mjaftonte turp i madh i fut dhe një skandaloze në fund.
Cili na qenka ky turp i madh sipas teje, që librat nuk janë falas për të gjithë deri në fund të studimeve siç e ka gjithë bota shkruajnë dhe disa miq të tjerë. Në fakt jo vetëm që nuk e ka gjithë bota siç thoni ju por pa shkuar larg nëpër botë po ju sjell shembullin e Serbisë, Malit të Zi apo dhe Kroacisë, vend i BE-së nuk i japin librat falas për asnjë klasë. Apo shembulli i Italisë kur librat falas jepen vetëm nga klasa e parë, në të pestën fillore.
Do ju kisha sjellë dhe shembuj të tjerë, deri në Zvicër po deshët por po e lë me kaq këtë fjalinë pa lidhje siç e ka gjithë bota. Tani që të jemi të qartë, ambicia ime është që deri në fund të këtij mandati librat të bëhen falas për të gjitha vitet e arsimit të detyruar, pra deri në klasën e nëntë. Po pse të presim deri pasnesër, e të mos e bëjmë që pardje mund të thuash ti. Por ja sikur të të pyes njëherë ty Alida po pse në shtëpinë tënde nuk i bëni të gjitha ato që doni sepse këto janë mundësitë apo jo. Prandaj ju në shtëpi përpiqeni sot me punë, me sakrificë, me durim që mundësitë të rriten dhe nesër të plotësoni më shumë nevoja e dëshira.
E njëjta gjë vlen edhe për shtëpinë tonë të përbashkët, Shqipërinë. Prandaj ne i kemi hyrë detit në këmbë për reformat që s’u bënë, për rregullat që s’i vunë për çerek shekulli se po të ishin bërë me kohë sot ohu ku do ishte Shqipëria. Ama nëse i humbën 25 vjet pa bërë aq sa duhej bërë dhe sot paguajmë koston e mungesës së vizionit dhe kurajës nuk mund të humbim edhe 25 të tjera duke i lënë punët e sotme për nesër. Por frytet e kësaj periudhe reformash nuk i marrim dot të gjitha përnjëherë por hap pas hapi dhe me durim. E dashur Alida kujto shembullin që të solla për shtëpinë tënde dhe mos harro se siç nuk ka asnjë lidhje me turpin përkundrazi respekt për ty të bësh sot për shtëpinë maksimumin që mundesh edhe pse nuk është fare maksimumi që do ashtu nuk është aspak turp përkundrazi që sot të kemi mundësi tu japim librat falas 190 mijë fëmijëve dhe të kursejmë miliona euro prindërve të tyre.
