Një minibus me 16 dasmorë është përplasur me barrierat në një autostradë në Turqi, duke lënë të plagosur 14 prej tyre.
Automjeti u përplas me barrierat dhe u përmbys në mes të rrugës pasi i plasi një prej gomave. Agjencia e lajmeve “IHA” raporton se në mesin e të plagosurve ka edhe fëmijë.
Aksidenti ndodhi mesditën e sotme në autostradën që lidh Stambollin me Bursën. Dasmorët ishin nisur nga Arnavutkoy (Fshati shqiptar) për në Bursa, ku do të merrnin pjesë në dasmën e një të afërmit të tyre.
Në vendngjarje mbërritën menjëherë disa ambulanca, të cilat transportuan në spitalet më të afërta të plagosurit. Fatmirësisht asnjë prej të plagosurve nuk është në rrezik për jetën.
