Pesë persona janë akuzuar nga policia franceze në Paris për vrasjen e një prostitute transgjinore peruane, e cila u qëllua për vdekje pasi u përpoq të mbronte klientin e saj. Vanesa Campos 36 vjeç u vra mesnatën e 16-17 Gushtit në një park, që njihet si zona e prostitutave.
Vrasja e 36-vjeçares ndezi një valë zemërimi të prostitutave dhe aktivistëve të LGBT. Qindra vetë marshuan në Paris duke kërkuar mbrojtje më të madhe dhe siguri për prostitutat. Ato mbanin në duar pankarta ku shkruhej “Drejtësi për Vanesën”, por gjithashtu akuzuan shtetin francez si “pjesëmarrës” në vrasjen e një gruaje transgjinore.
“Ligji është 100% përgjegjës për vrasjen e Vanesës”, thanë protestuesit. Prostitutat kërkojnë shfuqizimin e një ligji të vitit 2016, që e kategorizon vepër penale prostitucionin. Për këtë arsye, prostitutat në Francë thonë se janë të detyruara të punojnë në vende të izoluara për të shmangur policinë.
Sipas mediave franceze, Vanesa punonte si prostitutë prej dy vitesh. Ajo ishte me një klient kur 10 burra të pajisur me pistoletë, thika e shkopinj tentuan të grabisnin makinën e tij. Vanesa u përpoq të mbronte klientin e saj, por u vra me një plumb në gjoks. Nuk dihet nëse klienti u lëndua apo jo. Javën e kaluar, policia franceze arrestoi 8 persona dhe 5 janë akuzuar për vrasje dhe grabitje.