Nga Boldnews.al
Taulant Balla po kalon ditë të nxehta politike. Ai është vënë në shënjestër të opozitës dhe të opinionit publik për lidhje me një ish-anëtar të Aldo Bares, biznesnemin Mond Bego, i cili është dënuar në vitin 2009 me 20 vjet burgim nga gjykatat italiane për pjesëmarrje në organizatë kriminale narko-trafiku.
Numri dy i socialistëve po mundohet ta kalojë këtë “siklet” me reagime anemike përballë akuzave për lidhjet e tij me krimin. Por pasditen e së Mërkurës, ai ka bërë një lëvizje, në duke propagandistike, por që mbart mesazh domethënës për socialistët dhe lidhjet e eksponentëve të saj me personazhe të botës së errët të krimit.
Balla është shfaqur në Elbasan, në zonën e tij operative, në krah të kryetarit të Bashkisë së qytetit, Qazim Sejdini, në përurimin e një rruge, të emërtuar “Çaush Asllani”. Përveç preajrdhjes nga zona e Elbasanit, Balla dhe Sejdini kanë një element të përbashkët dhe shumë aktual-ata të dy akuzohen se kanë lidhje të forta miqësore apo familjare me pjesëtarë të bandave kriminale.
Qazim Sejdini është i vetmi kryetar bashkie në Shqipëri që mbrohet nga një eskortë bodigardësh. Ai nuk e ka pranuar asnjëherë këtë fakt, por elbasanllinjtë dhe jo vetëm, e dinë shumë mirë që Sejdini nuk del asnjëherë në publik pa mbrojtësit e tij. Ai është i detyrua të marrë masa sigurie për shkak të aktiviteteve të dyshuara kriminale të dhëndrit të tij, Sokol Sanxhaktari.
Ky i fundit është një emër shumë i njohur në Elbasan, por edhe më gjerë, sidomos për shkak të përplasjeve të shpeshta dhe të përgjakshme që grupi i tij ka zhvilluar ndër vite me një tjetër familje në Elbasan, Çapjat.
Shumë të dhëna policore dhe operative e lidhin Sanxhaktarin me veprimtari të ndryshme kriminale në qytetin e Elbasanit, gjatë viteve të fundit. Gjithësesi, policia lokale, por edhe ajo qëndrore, ka dështuar me sukses që të arrestojë dhe të gjejë prova e fakte ndaj tij. Duket qartë që ai gëzon mbështetjen e plotë të vjehrrit të tij, Qazim Sejdinit, një prej personazheve më të fortë të socialistëve në Shqipërinë e Mesme.
Nga ana tjetër, Taulant Balla ka qenë shpesh nën kritikat e opozitës për lidhjet e tij me personazhe të botës së krimit. Pak muaj më parë, kryetari i Partisë Demokratike, Lulzim Basha, paralajmëroi se në portin e Durrësit do të mbërrinin dy makina Toyota Yaris, të mbushura me miliona euro. Sipas Bashës, kjo ngarkesë vinte për llogari të një grupi të rrezikshëm kriminal nga Elbasani dhe makinat me euro do të mbërrinin pa probleme në Shqipëri, pasi për to kishte dhënë garanci Taulant Balla.
Ky i fundit i hodhi poshtë akuzat, por paralajmërimet e Bashës për mbërritjen e Toyota-ve me 3.4 milionë euro u provuan, kur, policia shqiptare, me këmbënguljen e partnerëve ndërkombëtarë, bllokoi dy makina në Portin e Durrësit, ku gjendej edhe shuma e parave.
Në fillim të kësaj jave, opozita e akuzoi sërish Taulant Ballën për lidhje të forta me ish-narko-trafikantin, tashmë biznesmen ndërtimi, Mond Bego, i cili u arrestua për disa orë në Greqi, për llogari të autoriteteve italiane.
Balla, sërish me një reagim anemik, u mundua ta mohonte se kishte lidhje me Mond Begon. Por më pas, ai u detyrua të deklaronte se kishte miqësi familjare me bashkëpunëtorin e Aldo Bares, por “as ai dhe as PS nuk i kanë dhënë atij mbështetje politike”.
Tashmë që Balla është në vështirësi të mëdha politike, ai zgjodhi të dalë në krah të Qazim Sejdinit, i cili gjithashtu nuk duket se është ‘qelibar” sa u përket lidhjeve të tij me persona me aktivitet kriminal. Sejdini ka gjetur gjithnjë rrugën për të shuar zhurmën publike të akuzave ndaj tij. Balla, me shumë mundësi, ka se çfarë të mësojë në këtë drejtim nga “Lala i Elbasanit”.
