Sezoni i ri mediatik që nis në muajin shtator do të jetë i pari për Ben Blushin si drejtues i Top Channel, duke qenë se ai u afrua në këtë televizion në gjysmën e dytë të sezonit që u mbyll këtë verë. Për këtë arsye, Blushi ka planifikuar ndryshime të shumta në programacionin e ‘TCH’, që këtë sezon do të ketë firmën e tij.
Burime brenda stafit drejtues i thanë Politiko.al se në Top Channel do të transmetohen 15 emisione dhe nga këto, janë dhjetë emisione të reja ose të rinovuara tërësisht, siç është rasti i ‘Top Story’.
Politiko.al ka mësuar gjithashtu se Alban Dudushi do të vijojë punën në këtë televizion, pavarësisht lajmeve që kanë qarkulluar gjatë verës për një largim të mundshëm të tij. Ai është në negociata vetëm për ditët dhe orët se kur do të transmetohet emisioni.
Sa i përket programit që do të shfaqet në ‘prime time’, drejtuesit nuk kanë marrë ende një vendim përfundimtar, por janë duke vijuar negociatat.
Raportohet gjithashtu se gazetarja Eni Vasili, që drejton emisionin ‘Studio e Hapur’ në Neës 24, është në negociata me Top Channel. Ky është aplikimi i dytë që Vasili bën për t’u larguar nga televizioni që drejtohet nga Irfan Hysenbelliu, pas negociatave të zhvilluara me televizionin e ri informativ, ‘A2’.