Humbja me Sassuolon nuk la aspak shije të mirë në ambientin zikaltër dhe i pari që e di mirë këtë është pikërisht trajneri Luciano Spalletti. Të dielën në mbrëmje, në “San Siro” do të zbresë Torino, një skuadër që gjithashtu e nisi me humbje, por duke zhvilluar një paraqitje dinjitoze ndaj Romës.
Ky do të jetë debutimi i parë sezonal para tifozëve zikaltër, që pavarësisht startit me humbje, pritet të jenë rreth 60 mijë në shkallët e stadiumit, për të mbështetur djemtë e Spallettit.
Ky i fundit e ka të qartë që nëse skuadra nuk do të rikthehet te triumfi menjëherë, rrezikon të kalojë një ngërç psikologjik dhe të humbë pikë që mund të peshojnë shumë në ecurinë e sezonit.
Ndaj ka filluar që tani të planifikojë me kujdes 11-shen që do të hedhë në fushë ndaj Torinos, ndërsa mediat pranë zikaltërve raportojnë për të paktën 5 ndryshime, krahasuar me 11-shen që startoi ndaj Sassuolos.
Kështu të parët që do të ulen në stol, do të jenë dy brazilianët e mbrojtjes, Miranda-Dalbert, me të parin që nuk është ende në maksimumin e formës së ti jdhe të dytin, që zhgënjeu edhe njëherë dhe vështirë se di të arrijë të gjejë minuta në formacionin e Spallettit.
Në vend të Mirandës do të rikthehet sllovaku Skriniar, një pikë stabil e formacionit të Spallettit, ndërsa në të majtë të mbrojtjes do të luajë Asamoah. Edhe në krahun e djathtë mund të debutojë Vrsaljko, duke ulur në stol D’Ambrosion, por fillimisht duhet vlerësuar gjendja e tij fizike, pasi ka filluar stërvitjen vetëm më datë 8 Gusht.
Vend për ndryshime edhe në mesin e fushës, ku e sigurt është që nga minuta e parë do të rikthehet Gagliardini, për të luajtur në krah të Brozoviç, ndërsa ka ende dyshime për lojtarin që do të luajë pas shpinës së Icardit.
Nëse Nainggolan do t’ia dalë, atëherë do të jetë ai në fushë dhe Lautaro Martinez do të nisë nga stoli, por nëse belgu nuk ia del, do të konfirmohet sërish argjentinasi, pas shpinës së kapitenit Icardi.
Ndryshime edhe në krahët e sulmit, ku e sigurt është që do të rikthehet Perisiç në të majtë, ndërsa në krahun e djathtë do të ketë një balotazh deri në sekondat e fundit, mes Politanos dhe sulmuesit senegalez, Keita Balde.
Natyrisht që ky nuk është momenti ideal për Spallettin, pasi shumë lojtarë janë bashkuar me skuadrën vetëm në fillim të Gushtit dhe nuk kanë formën e duhur fizike, ndërsa mbetet për t’u kolauduar edhe bashkëpunimi në fushën e lojës.
Megjithatë, deri në momentin e ndërprerjes Interi do të presë Torinon dhe do të udhëtojë në “Dall’Ara, ku do të përballet me Bolognën, dy sfida ku kërkohet maksimumi i pikëve, për të pritur qetësisht më pas sfidën ndaj Parmës më 16 Shtator, kur edhe skuadër të ketë gjetur ekuilibrat e duhur në fushë.
