Nga Boldnews.al
Lajm tjetër nuk zinte vend në mediat shqiptare përveç masakrës së Selenicës, ku Ritvan Zykaj të premten e kaluar vrau me gjakftohtësi tetë kushërinjtë e tij, mes të cilëve dy fëmijë dhe tre gra. Krim më të kobshëm nuk kishte kaluar Shqipëria që pas ngjarjeve të vitit 1997, por kryeministri Edi Rama habiti jo pak kur të nesërmen e ditës së ngjarjes, teksa gjaku i viktimave ende nuk ishte tharë, uroi gjithë shqiptarët për një javë të qetë…
“Me këtë videoinformacion për ecurinë ekonomike, punësimin dhe bizneset e reja në vend, ju uroj një fundjavë të qetë”, shkruante Rama në facebook. Komentuesit, përfshi edhe idhtarët e tij, iu vërsulën me ironi që të thotë edhe ndonjë fjalë për krimin e rëndë. Në këtë rast policia apo instatncat shtetërore nuk mund të viheshin në faj, pasi krimi në mendjen e 24-vjeçarit nuk mund të parandalohej dhe policia edhe pse disi me vonesë, kreu detyrën duke arrestuar autorin. Por mbulimi i vdekjes me “lulet” e Ramës ishte ironia më e madhe për krimin që trazoi gjithë vendin.
Kreu qeverisë para se të shihte statistikat për rritje ekonomike, e lloj e soj informacionesh që sipas tij tregojnë zhvillimin e madh në vendin tonë, duket të kishte një qëndrim për një tjetër statistikë, atë njerëzore. Në regjistra atë ditë mungonin tetë jetë të marra nga armët…
Minimalisht, në vend të postimeve me të qeshura, optimizëm e propagandizëm, Rama mund të ngushëllonte të mbeturit nga tre familjet Zykaj, mund të jepte një mesazh qetësie, apo çdo formë tjetër për të dënuar krimin. Por ai kurrë nuk e zu me gojë për tre ditë radhazi, por i detyruar nga komentet mjaft negative dhe fort ironizuese të komentuesve, u detyrua të shkruante me përtesë e hakërrim disa rreshta “sqaruese” që ngjanin me reagimin e një personi të detyruar “postmortem”…
Duke iu përgjigjur një komentuesi Rama nëpërmjet tij kërkonte ti mbyllte gojën edhe të tjerëve: “Më fal ti jeton në këtë botë apo jeton në hënë, sepse në këtë botë, ndodhira të tilla ekstreme ndodhin edhe në vendet më të zhvilluara demokratike, e nuk kanë asnjë lidhje me qeverinë!”-komentoi kryeministri.
Ajo ngjarje nuk kishte lidhje me qeverinë dhe kjo është po aq e vërtetë sa bota reale Shqiptare, (jo ajo e jetësës në hënë), është krimi në mes të ditës. Janë armët në duart e njerëzve, është papunësia, plazhet bosh në kulmin e sezonit, mijëra të ikur nga vendi, statistikat e frikshme të aksidenteve, pasiguria mbi pronën, jetën dhe shëndetin. Për njëshin e qeverisë këto janë “detaje” pa rëndësi. Ka një Shqipëri tjetër e cila është vetëm në kokën e kryeministrit dhe kabinetit qeveritar. Sipas tij, rritja ekonomike, bumi turistik, punësimi marramendas i të rinjve, investimet infrastrukturorë dhe zgjidhja e halleve në portalin “shqiperiaqeduam” janë të vërtetat për punën e mirë të kësaj qeverie. Për Ramën, problemet e përditshme janë sajesa të mediave kazan, apo të individëve që nuk e shohin mrekullinë shqiptare, e veçanërisht të mrekullueshmen qeveri. Të tjerat janë disa ndodhira të zakonshme…!
