Anëtari i Gjykatës së Lartë, Shkëlzen Selimi, ka hedhur dyshime të forta mbi mënyrën e funksionimit të trupës gjyqësore të Komisionit të Pavarur të Kualifikimit që po zhvillon procesin e rivlerësimit ndaj tij.
Selimi deklaroi në seancën dëgjimore, zhvilluar të premten paradite se, ka dyshime që të dhëna konfidenciale të tij, të dorëzuara pranë Komisionit të Vetingut, mund t’i jenë shitur televizionit kombëtar Top Channel.
“Përmes komunikimit publik me është bërë me dije përbërja e trupës gjyqësore. Unë kam shprehur konsideratën për të tre anëtaret e KPK. Por nisur nga faktet që kanë ndodhur rishtaz dua të nisë hetimi disiplinor ndaj trupës, sepse në Televizionin Top Channel dje (e enjte) është transmetuar një kronike, ku jepen të dhëna sensitive për personin tim. Unë kërkoj pezullimin e seancës dëgjimore, sepse do i kërkoj Operacionit Ndërkombëtar të Monitorimit (ONM) të nisë procedurën disiplinore, pasi janë publikuar të dhëna kofidecinale . Unë dyshoj se këto të dhëna i janë shitur këtij televizioni dhe mendoj se ky TV ka shkuar më tej sa të ndikojë në këtë proces”- tha gjyqtari.
Selimi u paraqit të Premten në seancën dëgjimore pranë KPK-së, ku do të njihej zyrtarisht me rezultatet e procesit të hetimit administrativ. Por, që në nisje të seancës, Selimi ka kërkuar pezullimin e procesit, duke argumentuar se trupa gjyqësore e Vetingut, e përbërë nga Etleda Çiftja, Xhensila Pine dhe Valbona Sanxhaktari, ka shkelur parimin e konfidencialitetit, e mbrojtur edhe nga Konventa Europiane e të Drejtave të Njeriut.
Kërkesa e gjyqtarit Selimi u rrëzua nga treshja gjykuese, e cila vijoi më tej seancën pa praninë e subjektit, i cili vendosi ta braktiste vijimin. Drejtuesja e seancës, Etleda Çiftja, deklaroi se “subjekti ka të drejta të bëj kërkesa për pezullim dhe për hetimin e trupës gjykuese, por kjo nuk e pengon trupën që të vijojë procesin”. Pasi dëgjoi këtë argument, gjyqtari Shkëlzen Selimi u ngrit nga karrigia, duke lënë sallën e seancës dëgjimore.
Sipas deklarimeve të relatores së çështjes, gjyqtari Shkëlzen Selimi po rivlerësohet vetëm për kriterin e integritetit moral dhe nuk kanë kryer verifikime për pasurinë e për aftësitë profesionale të tij.
Nga Boldnews.al
