Komisioni i Pavarur i Kualifikimit ka rrëzuar kërkesën e anëtarit të Gjykatës së Lartë, Shkëlzen Selimi, për ndërprerjen e procesit të Vetingut, pasi ky i fundit argumentoi se trupa gjyqësore e përbërë nga Etleda Çiftja, Xhensila Pine dhe Valbona Sanxhaktari, ka shkelur parimin e njohur ndërkombëtarisht të mbrojtjes së konfidencialitetit.
Selimi deklaroi në seancën që u zhvillua paraditen e së Premtes se, Komisioni i Pavarur i Kualifikimit ka dështuar që të ruajë konfidencialitetin e të dhënave, të dorëzuara prej tij në kuadër të procesit të rivlerësimit.
Të dhënat konfidenciale të gjyqtarit Selimi janë bërë publike nga televizioni Top Channel, dhe janë shndërruar në objekt shantazhi dhe presioni të vazhdueshëm ndaj tij gjatë javëve të fundit.
Pas kërkesës së Selimit, tresha gjykuese e KPK-së u tërhoq në dhomë këshillimi dhe vendosi të mos e pranojë argumentin e anëtarit të Gjykatës së Lartë. Pas rrëzimit të kërkesës, gjyqtari Selimi është larguar nga seanca dëgjimore, duke lënë trupën e vetingut që të vijojë monologun para gazetarëve.
Në fillim të seancës dëgjimore, anëtari i Gjykatës së Lartë, Shkëlzen Selimi, kërkon pezullimin e procesit të Vetingut ndaj tij dhe hetimin e trupës gjyqësore të Komisionit të Pavarur të Kualifikimit, për shkak të shkeljes së parimit të konfidencialitetit.
Selimi gjendej sot para Komisionit të Vetingut, ku duhet të përballet me gjetjen mbi pasurinë, integritetin personal dhe aftësitë profesionale. Por, që në fillim të seancës dëgjimore, gjyqtari i Lartë ka kërkuar ndërprerjen e procesit, me argumentin se trupa gjyqësore është e njëanshme, pasi ka furnizuar me informacion konfidencial ndaj tij një televizion.
Prej disa javësh, Top Channel ka nisur një fushatë denigruese ndaj gjyqtarit Shkëlzen Selimi, bazuar, kryesisht, në të dhënat që ka administruar Komisioni i Pavarur i Kualifikimit, në kuadër të procesit të vetingut.
Në bazë të ligjit, KPK ka detyrimin ligjor që të ruajë konfidencialitetin e korrespondencës dhe të të dhënave të përftuara gjatë procesit të rivlerësimit. Por, siç ka konstatuar vetë Selimi, disa të dhëna konfidenciale janë publikuar, në mënyrë abuzive dhe shantazhuese nga Top Channel.
Për këtë arsye, ai kërkoi pezullimin e procesit të vetingut ndaj tij dhe nisjen e hetimit për trupën gjyqësore të KPK nga ana e Operacionit Ndërkombëtar të Monitorimit.
BOLDNEWS.al
