Emisioni “Boom” këtë herë është ndalur tek siguria ushqimore. Produkti i akullores, një ndër më të preferuarit e sezonit të verës, nën ambalazhin tërheqës për të rritur apo fëmijë, prodhuar në Shqipëri apo ardhur nga jashtë, ka një të përbashkët, afatin 2- vjeçar të jetëgjatësisë. Edhe pse një pjesë e mirë e tyre nuk ka asnjë datë prodhimi në etiketë, gazetarët e “Boom”i kanë blerë këto akullore në qershor të këtij viti, ndërsa në etiketë lajmërohet skadenca në muajin tetor të vitit 2020.
Në disa nga këto akullore, data e skadencës fshihet thjesht duke e prekur me gisht. Në tregun shqiptar, gazetarët gjetën edhe një produkt të ardhur nga Iraku, një akullore për fëmijë, e cila në paketim kishte një nga personazhet më të dashur për ta.
Nëse përbërësit e akulloreve janë disa nga përbërësit më delikat, si qumështi, veza, uji, ëmbëltuesit produkte këto të cilat veç e veç kanë një afat shumë më të shkurtër skadence , atëherë si ka mundësi që këto akullore mund të ruhen për më shumë se 2 vjet?
Sipas drejtorit të Zyrës për Mbrojtjen e Konsumatorit, Hasan Stafa ,afati i parashikuar për jetëgjatësinë e një akulloreje është 126 ditë dhe vendosja e një afati kaq të gjatë skadence, është në kundërshtim me ligjin për mbrojtjen e konsumatorit.
Nga analizat që emisioni “Boom” ka bërë në Institutin e Sigurisë Ushqimore dhe Veterinare, prodhimi shqiptar me afat skadence deri ne 2020, ka dalë me ngarkesë mikrobiologjike 19 herë mbi normën e lejuar, ç`ka nënkupton rrezikun që përbën qëndrimi i tij në treg, aq më tepër edhe për dy vjet. Prezenca e lartë e enterobakterieve shkakton helmime të cilat mund të sjellin pasoja të rënda tek konsumatori, aq më tepër tek fëmijët.
Ndërsa produkti i ardhur nga jashtë ka dalë me ngarkesë mikrobiologjike 0, ç`ka sipas specialistëve tregon se kjo akullore ka në përbërje shumë aditivë, të cilët nuk lejojnë zhvillimin e asnjë mikrobi. Prezenca e shtuar e aditivëve mund të bëhet shkak për sëmundje të rënda, përfshi dhe ato kancerogjene.
Sipas Autoritetit Kombëtar të Ushqimit “Data e jetëgjatësisë minimale për një ushqim të caktuar do të jetë data deri në të cilën produkti ushqimor ruan karakteristikat e tij specifike, me kusht që të jetë ruajtur në mënyrë të përshtatshme”.
Përgjatë këtij investigimi asnjë nga specialistët apo zyrtarët e autoriteteve që merren me sigurinë ushqimore nuk pranuan të prononcohen në lidhje me problemin, por nga burime të brendshme “Boom”mësoi se disa nga punonjësit e Institutit të Sigurisë Ushqimore dhe Veterinare janë me urdhra mbrojtjeje, për shkak të kërcënimit nga bizneset.
https://youtu.be/yOi4X87t6uo
