TIRANE – Raporti i Departamentit Amerikan të Shtetit, lidhur me klimën e biznesit për vitin 2018 (Investment Climate Statements for 2018) nuk e ka përfshirë Shqipërinë në listën e vendeve ku u sugjerohet investitorëve amerikanë për të bërë biznes.
Pas këtij raporti ka reaguar kreu i deputetëve të LSI-së në kuvend. Petrit Vasili, shkruan se raporti përcjell një mesazh të rëndë për klimën e biznesit.
”Ky është mesazhi më i rëndë për klimën e bisnesit në Shqiperi por dhe për biznesin e huaj që do të donte të investonte në Shqipëri. Klima e biznesit në Shqipëri po përjeton absolutisht momentin më të keq dhe më negativ të saj,” shkruan Vasili.
”Një koplas ekonomik”, e cilëson Vasili rrugën që qeveria ka zgjedhur, që sipas tij lidhet vetëm me pastrim paraje dhe se ekonomia po shkon drejt një rrënimi social.
Statusi i plotë
Përjashtimi nga DASH-i i Shqipërisë si vend atraktiv, mesazh shumë i rëndë për klimën e bisnesit.
Një mesazh shumë i rëndë për klimën e biznesit vjen nga Departamenti Amerikan i Shtetit.
Raport i Departamentit Amerikan të Shtetit, lidhur me klimën e biznesit për vitin 2018 (“Investment Climate Statements for 2018”) nuk e ka përfshirë fare Shqipërinë, ndryshe nga një vit më parë, pra 2017 ku Shqiperia ishte pjesë e listës së vendeve, që SHBA i sugjeron investitorve amerikanë për të bërë biznes.
Ky është mesazhi më i rëndë për klimën e bisnesit në Shqipëri por dhe për biznesin e huaj që do të donte të investonte në Shqipëri. Klima e biznesit në Shqipëri po përjeton absolutisht momentin më të keq dhe më negativ të saj.
Klimën e biznesit e ka përkeqësuar, dekurajuar dhe deprimuar pastrimi i çfrenuar i parave të pista në Shqipëri, për të cilin Departamenti Amerikan i Shtetit ngriti alarmin pak muaj më parë duke rikthyer Shqipërinë në Listën e Zezë të vendeve që pastrojnë masivisht paratë e drogës, krimit, trafikut të qënieve njerëzore, korrupsionit etj.
DASH raportonte: “Shqipëria ka një ekonomi të madhe ‘cash’ dhe informale, me flukse domethënëse parash që hyjnë nga jashtë në formën e remitancave. Burimet kryesore të parasë kriminale vijnë nga trafiku i drogës, evazioni fiskal, kontrabanda dhe trafiku i qënieve njerëzore”.
Kryeministri dhe qeveria kanë vetëm dhe vetëm një objektiv, shkatërrimin e biznesit të ndershëm dhe ndërtimin e autostradave të pastrimit të parasë, ndaj grabisin pronën publike, japin tokën e Gardës së Republikës, shkatërrojnë Teatrin, shpartalluan Tiranën me kulla dhe rrëmbejnë qindra miliona euro në koncesione pirate që i dhurohen përditë krimit të organizuar. Shqipëria po rrëshqet shumë rrezikshëm drejt kolapsit ekonomik.
Qeveria në ikje po ndjek strategjinë e tokës së djegur me moton “të rrëmbejmë ç’të mundemi dhe pas nesh le të bëhet qameti”. Kjo qeveri piramide po i çon shqiptarët drejt një tragjedie ekonomike dhe sociale të përmasave tepër të mëdha.
