Në momentin më të ‘nxehtë’ të merkatos së Partizanit ridel në skenë një emër i dashur për klubin dhe tifozët e kuq. Mediat britanike sjellin në Tiranë ish-sulmuesin e Chievo-s që u dha në huazim për një sezon te Partizani.
34 ndeshje dhe 17 gola, ky ishte sulmuesi Caleb Ekuban te Partizani në sezonin 2016/17. Paraqitja që ai bëri në Shqipëri e ndihmoi që të bënte një hap të madh në karrierë, duke u transferuar nga Chievo, që kishte në zotërim kartonin e tij, te Leeds United në Championship në Angli.
Por, tek ishullorët ganezi nuk mundi që të përshtatej, 991 minuta në fushë për 1 gol, aq sa u bë i papëlqyeshëm për trajnerin Bielsa. Tashmë anglezët kanë menduar që ta largojnë ganezin që zhgënjeu.
Mediat ishullore tashmë shkruajnë se interesimi i parë për ganezin ka ardhur, bëhet fjalë po për Partizanin, skuadër që lojtari e njeh mjaft mirë sepse ka kaluar një periudhë të mirë në çdo aspekt.
Duke qenë se Partizani tashmë është në kërkim të një lojtari që do të marrë përsipër sulmin, Ekuban është alternativa më e mirë e momentit. Ai e njeh kampionatin shqiptar, por edhe mentalitetin e të kuqve. Kështu që zhvillime të reja pritet që të ketë në ditët në vijim duke qenë se te “Demat” po presin që të bëjnë blerje në sulm për shkak se Nikolic nuk ngroh, por edhe alternativat janë të pakta.
