Kryeministri Edi Rama ka reaguar sërish ditën e sotme në lidhje me procesin e Vettingut. Pas akuzave të djeshme nga ana e opozitës se është pikërisht ai që “ka sjellë llumin në Pallatin e Drejtësisë apo që e ka lënë vendin pa Gjykata”, kreu i qeverisë i përgjigjet me një status në Facebook.
“Më mirë djepi bosh se shejtani brenda!,” shkruan me ironi Rama.
Statusi i plotë:
Po mbetemi pa gjykata të sipërme?Jo! Po operojmë organizma të kancerizuar që e degraduan deri në kockë drejtësinë. Më mirë djepi bosh se shejtani brenda! Ky pastrim është shpëtim për dekada e breza që vijnë,rilindja e këtyre gjykatave është vetëm çështje e më pak se një viti.
Deputeti demokrat Gent Strazimiri dje akuzoi Kryeministrin dhe njerëzit e tij më të afërt si krijuesit e llumit në drejtësi përmes akteve, vendimeve e dispozitave ligjorë që nga viti 97. Strazimiri shkruajti se vendimi i Gjykatës Kushtetuese nuk është fletë-rrife por i detyrueshëm për zbatim.
Në një kohë kur mazhoranca i kërkoi konsensusin e opozitës për miratimin e ligjit të magjistratëve në Kuvend, për të cilin kërkohet 84 vota, kreu i grupit parlamentar të LSI Petrit Vasili tha dje se Rilindja i preu kokën drejtësisë dhe e la pa Gjykatat Supreme, Kushtetuese dhe të Lartë. Përmes një postimi në Facebook, Vasili shprehej se paketa e ndryshimeve për reformën në drejtësi u hodh poshtë nga mazhoranca.
