Nga Boldnews.al
Partia Socialiste nuk fshihet më pas gishtit-ajo ka nisur të pranojë publikisht se është në dijeni se çfarë do të ndodh me emra të veçantë në procesin e Vetingut, para se gjyqtarë dhe prokurorë të marrin vlerësimin përfundimtar nga institucionet e rivlerësimit.
Kampion në llojin e tij është kryetari i Komisionit të Ligjeve, Ulsi Manja, i cili ka marrë së fundmi edhe gradën “doktor në krimet mjedisore”. Gjatë shpërthimeve të tij ekzaltuese për rezultatet e Vetingut, dr. Manja tregon më shumë se sa duhet në publik.
Të hënën, gjatë një monologu para gazetarëve, të cilët nuk kishin mundësi të merrnin përgjigjet për pyetjet e tyre, dr. Manja u shpreh ndër të tjera: “…kandidatët e Këshillit të Emërimeve në Drejtësi që janë shkarkuar tashmë nga vetingu, do të zëvendësohen me procedurën e shortit, siç e parashikon ligji…”.
Në një situatë normale, kjo deklaratë e dr. Manjën do të konsiderohej korrekte. Por, në këtë moment, asnjë prej anëtarëve të Këshillit të Emërimeve në Drejtësi (KED) nuk është shkarkuar nga detyra e gjyqtarit dhe e prokurorit. Vetëm, nëse dr. Ulsiu është në dijeni se çfarë do të ndodhë me fatin e tyre, përpara se këtë ta vendosin komisionet e vetingut, të cilët, si rregull, janë të pavarur.
Këshilli i Emërimeve në Drejtësi është një nga strukturat e reja të parashikuara nga Reforma në Drejtësi. Ky institucion përbëhet nga 9 anëtarë, gjyqtarë e prokurorë, të cilët kanë për detyrë të realizojnë filtrimin paraprak të kandidatëve për anëtarë të Gjykatës Kushtetuese dhe për Inspektor të Lartë të Drejtësisë.
Deri më tani, nga 9 anëtarë të KED, vetëm 3 kanë dalë para Komisionit të Pavarur të Kualifikimit, e cila është shkalla e parë e Vetingut. Asnjë prej tyre nuk ka marrë një vendim përfundimtar, i cili i takon Kolegjit të Posaçëm të Apelimit.
Altina Xhoxhaj, përfaqësuese e Gjykatës Kushtetuese pranë Këshillit të Emërimeve në Drejtësi është pezulluar nga detyra, për faktin se shkalla e parë e Vetingut vlerësoi se ajo duhet të shkarkohet nga detyra, për shkak të gjetjeve problematike në procesin e rivlerësimit. Xhoxhaj ka ankimuar këtë vendim në Kolegjin e Apelimit, i cili, teorikisht, ka mundësinë ligjore për të vendosur rikthimin e saj në detyrë. Deri në momentin e shkrimit të këtij artikulli, KPA nuk ka marrë ende në shqyrtim ankimin e gjyqtares Xhoxhaj
Gent Trenova, përfaqësues i Prokurorisë së Apelit në KED, gjithashtu është pezulluar nga detyra, pasi Komisioni i Pavarur i Kualifikimit (KPK-shkalla e parë e vetingut), vlerësoi se ai duhet shkarkuar nga detyra. Edhe Trenova ka ankimuar vendimin e shkallës së parë dhe pret që Kolegji i Posaçëm i Apelimit (KPA) ta rikonfirmojë në detyrë. Deri në momentin e shkrimit të këtij artikulli, KPA nuk ka marrë ende në shqyrtim ankimin e prokurorit Trenova.
Rovena Gashi, përfaqësuese e Prokurorisë së Përgjithshme në Këshillin e Emërimeve në Drejtësu, ende nuk kishte marrë vendimin nga shkalla e parë, kur dr. Ulsi Manja deklaroi se “…të shkarkuarit e KED do të zëvendësohen me procedurën e shortit…”.
Duket qartë që fati i këtyre tre anëtarëve të KED-së është paracaktuar nga dr. Manja, i cili rezulton se është në dijeni të vendimmarrjes përfundimtare të institucioneve të Vetingut, para se këto të fundit të marrin në shqyrtim dosjet e gjyqtarëve dhe prokurorëve.
Maxhoranca e dr. Ulsiut përbetohet se strukturat e Vetingut janë të pavarura. Ajo që duket e sigurt është se procesi i Vetingut është i pavarur…vetëm nga opozita. Ose, ekziston edhe një mundësi tjetër, e pagjasë, që dr. Ulsi Manja të shohë horoskopin.
