Dy gra nga Minesota të cilat u detyruan të largohen nga pishina publike sepse po ushqenin me gji foshnja kanë marrë mbështetjen e dhjetëra nënave.
Stephanie Buchanan dhe Mary Davis ishin duke u relaksuar në pishinën e fëmijëve me foshnjat e tyre në krahë, kur djali tre-muajsh i Stephanie kishte uri dhe filloi të qante.
Ajo filloi ti jepte gji, kur një grua iu afrua për ti thënë se duhet të mbulonte gjoksin. Pastaj Mary, vendosi që të ushqejë fëmijën e saj në të njëjtën formë, për të treguar solidaritet.
Më pas një punonjës iu afrua për ti thënë se duhet të mbulonin gjoksin ose të shkonin në dhomën e zhveshjes. Ato refuzuan të largoheshin dhe në momentin që dolën jashtë pishinës, një oficer policie iu afrua.
“Ligji i shtetit më mbron që të ushqej fëmijën kudo që ka nevojë”, i tha Stephanie oficerit, i cili i tregoi se institucioni ka të drejtë ti kërkojë që të largohen. Nënat e tjera u ndjenë keq për mënyrën e turpshme se si ato u trajtuan, prandaj vendosën që të ushqenin foshnjat e tyre në publik për të treguar se nuk mund ta caktojnë momentin kur fëmija ka nevojë për ushqim.
