Një zyrtar i CIA-s ka tërhequr menjëherë vëmendjen e mediave pas deklaratës se Kina tashmë ka nisur një luftë të qetë të ftohtë me Shtetet e Bashkuara. “Unë do të argumentoja… se ajo që ata po bëjnë kundër nesh është krejtësisht një Luftë e Ftohtë, një Luftë e Ftohtë jo si ajo që kemi parë (mes SHBA-ve dhe Bashkimit Sovjetik), por përkufizimi i një lufte të ftohtë”, tha Michael Collins, zëvendësndihmësdrejtor i qendrës së misionit të CIA-s në Azinë Lindore.
Deklarata u bë në Forumin “Aspen Security”, në Kolorado. Sipas tij, Pekini nuk dëshiron të shkojë në luftë, por qeveria aktuale komuniste, e Presidentit Xi Jingping, po punon hollësisht në fronte të shumëfishta për të minuar SHBA-të në mënyra të ndryshme nga aktivitetet më të njohura të përdorura nga Rusia.
Rritja e tensioneve SHBA-Kinë shkon përtej mosmarrëveshjes tregtare ndërmjet dy vendeve. Ekziston shqetësimi për përpjekjet e përhapura të Kinës për të vjedhur sekretet e biznesit dhe detajet rreth hulumtimeve të teknologjisë së lartë që po zhvillohen në SHBA. Ushtria kineze po zgjerohet dhe po modernizohet dhe Shtetet e Bashkuara, si dhe vende të tjera, janë ankuar për ndërtimin e posteve ushtarake të Kinës në ishuj në Detin e Kinës Jugore.
Qëllimi i operacioneve kineze për të shtrirë ndikimin në botë është që Kina të zëvendësojë Shtetet e Bashkuara si superfuqia udhëheqëse në planet. Por Collins tha se “kinezët nuk e duan konfliktin”.
Sipas tij, Kina kërkon që çdo vend në botë, kur vendos për interesat e tij, të mbajë anën e Kinës dhe jo të SHBA-ve. Zyrtari i CIA-s theksoi se kërcënimi që paraqet Kina është sfida më e madhe globale me të cilën SHBA përballet.
Komentet e tij pasqyruan ato të drejtorit të FBIsë Christopher Wray dhe drejtorit të Inteligjencës Kombëtare Dan Coats, që gjithashtu thanë se Kina është rreziku më i madh aktual për SHBA-të.
