Nga Boldnews.al
Deputetja e Partisë Socialiste, Vasilika Hysi, ka marrë detyrën e vështirë për të mbuluar këto ditë dështimin e Reformës në Drejtësi në Shqipëri. Me një fjalor romantik, pedagogia e së drejtës ka bërë thirrje të gjithë faktorit politik që të gjejnë gjuhën e kompromisit për të miratuar disa amendime në ligjin për Shkollën e Magjistraturës, miratuar vetëm dy vjet më parë, pa votat e demokratëve.
Deputetja Hysi, njëkohësisht nënkryetare e Parlamentit, nuk ka asnjë mesazh për zgjidhjen e kolapsit të sistemit të drejtësisë, me Gjykatën Kushtetuese inekzistente, Gjykatën e Lartë në prag të shkatërrimit dhe me nivelet e tjera të drejtësisë në situatën më të vështirë të mundshme.
Ajo është ngarkuar nga Partia Socialiste të flasë vetëm për ligjin për Shkollën e Magjistraturës, në një kohë kur asnjë prej baballarëve të Reformës në Drejtësi dhe “Ekspertëve të Nivelit të Lartë” apo edhe ata që e kanë për detyrë funksionale dhe institucionale, nuk duket më në skenën publike për të sugjeruar zgjidhje.
Fatmir Xhafaj, i vetëquajtur “babai i Reformës”, sot po mundohet të mbledhë disa copëza ndërhyrjeje policore, për t’ia atashuar asaj që ai e quan “Forca e Ligjit”. Ndërkohë, ende nuk ka të zgjidhur problemin me vëllain e tij, të dënuar për trafik droge.
Ulsi Manja, kryetari aktual i Komisionit të Ligjeve, duket se nuk vlerësohet në lartësinë e duhur për t’u përfshirë në diskutime të këtij niveli. Ai e arriti kulmin e tij me emërimin e Kryeprokurores së Përkohshme, nëpërmjet një procedure që vetëm ai mund ta kuptojë.
Etilda Gjonaj, Ministrja e Drejtësisë, mbulohet më së miri nga Vasilika Hysi. Ministrja aktuale ka qenë vartëse e deputetes Hysi, kur bashkëpunonin tek Komiteti Shqiptar i Helsinkit.
Rainer Deville, drejtuesi i misionit EURALIUS, zyrtari që deklaroi se “në Shqipëri duhet të ikin të 800 gjyqtarët dhe prokurorët”, prej më shumë se një viti nuk gjendet në vendin tonë, për shkak se u dallua shumë shpejt që kishte bërë gjatë gjithë kohës lojën e qeverisë “Rama”.
Sokol Sadushi, drejtori i Shkollës së Magjistraturës, lidhje krushqie e Fatmir Xhafaj, sot po ngre zërin për pranimin e studentëve, nëpërmjet një skeme, e cila synon që edhe rekrutimin e të rinjve ta kanalizojë në institucione ku ka ndikim qeveria.
Gent Ibrahimi, eksperti kushtetues i Soros, kunati i Mimi Kodhelit, ka humbur pa nam e nishan. Imazhi më i shpeshtë i “shoqërisë civile” gjatë diskutimeve për Reformën në Drejtësi, sot, mesa duket, nuk ia ndjen nevojën që të jetë i pranishëm në televizione.
Arben Rakipi, ish-Kryeprokuror, i cili nuk e ka fshehur asnjëherë mllefin për dyshen Nano-Berisha, të cilët e shkarkuan me një marrëveshje dypalëshe në vitin 2002, sot nuk duket askund. Rakipi mori përsipër rolin e ekspertit kryesor për amendimin e ligjit për Prokurorinë. Nuk pati asnjë kundërshtim publik kur maxhoranca zgjodhi vetëm me kartonët e saj Kryeprokuroren e Përkohshme.
Kristaq Traja, gjyqtar me përvojë, përfaqësues i fondacionit Soros në Komisionin e Reformës në Drejtësi. Nuk ka asnjë shenjë të tij në diskutimin e sotëm.
Jon Smibert, drejtuesi i OPDAT, deri para pak kohësh ishte vizitor frekuent i zyrës së Kryeprokurores së Përkohshme dhe vartëses së saj te Krimet e Rënda. Edhe ky ekspert, nuk ka për të thënë asnjë lidhur me kolapsin në sistemin e drejtësisë.
Romana Vlahutin, ambasadore e Bashkimit Europian, është duke përgatitur valixhet dhe pret zgjedhjet e vitit të ardhshëm për Parlamentin Europian, me shpresë që të gjejë ndonjë mik për t’i dhënë detyrë tjetër brenda strukturave të Brukselit.
Donald Lu, ambasadori amerikan në Tiranë, i cili mori autorësinë e plotë mbi Reformën në Drejtësi, duhet të ketë hapur librat e kujtimeve kur ka qenë zv.ambasador në Kirgistan. Tashmë ai pret të emërohet ambasador në vendin e largët aziatik dhe Reforma në Drejtësi në Shqipëri nuk hyn më në planet e tij.
