Nga Boldnews.al
Një anëtar i Gjykatës së Lartë u shkarkua të martën nga detyra, pasi Komisioni i Vetingut arriti në përfundimin se ai nuk kishte deklaruar “kontaktet e papërshtatshme” me persona të përfshirë në krimin e organizuar.
Komisioni i Vetingut zbuloi se gjyqtari Tom Ndreca nuk kishte shënuar në formularin përkatës që kunati i tij ishte proceduar para 8 vitesh për “posedim të lëndëve narkotike”, në sasinë 6 gramë. Hetimi ndaj shtetasit të proceduar ishte pushuar, për shkak se ai rezultoi posedues, por gjithësesi Komisioni i Vetingut ia ka konsideruar shkelje gjyqtarit Ndreca dhe vendosi shkarkimin e tij.
Por, a është mbajtja e lëndës narkotike vepër që përfshihet në krimin e organizuar? Komisioni i Vetingut do e kishte zbuluar fare lehtësisht, nëse do t’i hidhte një sy, ndoshta edhe shkarazi, Kodit Penal të Republikës së Shqipërisë.
Veprat penale që përfshihen në krimin e organizuar gjenden në kreun XI të Kodit Penal. janë vetëm 4 nene, të cilat, nëse Komisioni i Vetingut do të kishte vullnetin për t’i lexuar, nuk do t’i merrnin më shumë kohë.
Më konkretisht, Kodi Penal, parashikon:
Neni 284/a (Organizimi dhe drejtimi i organizatave kriminale); Neni 333(Organizata kriminale); Neni 333/a (Grupi i strukturuar kriminal), dhe; Neni 334 (Kryerja e veprave penale nga organizata kriminale dhe grupi i strukturuar kriminal)
Në asnjë prej këtyre neneve, ku parashikohen veprat që lidhen me “Krimin e organizuar”, nuk përfshihet mbajtja dhe prodhimi i lëndëve narkotike.
Madje, në nenin 283 të Kodit Penal, “Prodhimi dhe shitja e narkotikëve”, parashikohet se: Shitja, ofrimi për shitje, dhënia ose marrja në çdo formë, shpërndarja, tregtimi, transportimi, dërgimi, dorëzimi, si dhe mbajtja, përveç rastit të përdorimit vetjak dhe në doza të vogla, të substancave narkotike dhe psikotrope, si edhe i farërave të bimëve narkotike, në kundërshtim me ligjin ose në kapërcim të përmbajtjes së tyre, dënohet me burgim nga pesë gjer në dhjetë vjet.
Pra, në rastin konkret, kunati i gjyqtarit Ndreca, jo vetëm që nuk rezulton i përfshirë në “krim të organizuar”, por, për më tepër, siç ka rezultuar edhe nga hetimi, ai është përjashtuar nga përgjegjësia ligjore për shkak se ka rezultuar që lëndën narkotike “e ka pasur për përdorim vetjak”, si edhe sasia ka qenë shumë e vogël (6 gramë).
E megjithatë, Komisioni i Vetingut e ka konsideruar si “krim të organizuar” procedimin e para 8 viteve të kunatit të gjyqtarit Tom Ndreca dhe ka vendosur ta shkarkojë atë për shkak se nuk e ka deklaruar këtë “kontakt të papërshtatshëm”.
Ky rast dëshmon qartë se komisionerët e Vetingut duhet të kenë në tavolinën e tyre edhe Kodin Penal për të kuptuar se çfarë është krimi i organizuar, krahas “listës së parapërgatitur politikisht të shkarkimit të gjyqtarëve e prokurorëve”. siç po ngrihen dyshime të forta së fundmi.
