Deputetja e Partisë Demokratike, Jorida Tabaku gjatë fjalës së saj në Komisionin e Ekonomisë deklaroi se bizneset e ndershme e kanë të pamundur të operojnë në ekonomi.
Duke u ndalur tek shifrat ajo tha se vetëm gjatë qershorit 2018-të u mbyllën 1 mijë e 300 biznese. Kjo shifër siç tha ajo është 92% më shumë se sa qershori i 2017-ës.
“Kemi marrë informacion edhe për faktin që sigurisht, bizneset e ndershme e kanë të pamundur të operojnë në këtë ekonomi. Bizneset e ndershme të cilat përditë e më shumë po mbyten nga taksat dhe e kanë të pamundur që të konkurojnë një ekonomi tregu të lirë, kur ligjet e konkurrencës thyhen nga Parlamenti, sepse vijnë ligje me emra biznesesh. Bizneset e ndershme sot janë duke mbyllur dyert e tyre. Informacioni që kemi marrë nga Qendra Kombëtare e Biznesit thotë që: “Vetëm në qershor 2018 kanë kaluar pasiv, 1 mijë e 300 biznese. 92% më shumë se sa qershori i 2017-ës. Janar-Qershor 2018 janë 7 mijë biznese ose 49% më shumë se 6 mujori i vitit të kaluar. Nga 2014 e në vazhdim janë 68 mijë e 300 biznese që kanë kaluar pasivë.” Dhe kjo ka vetëm një përgjegjës. Ka përgjegjës ekonominë e krimit që po zhvillohet dhe nuk i lë të operojnë të lirë, në konkurencë të lirë dhe kjo ka përgjegjës kryeministrin Rama dhe qeverinë për rritjen e taksave. Hyrja në fuqi më 1 prill e TVSH-së me 20%, i ka dërrmuar këto biznese. Taksa e pronës është duke i dërrmuar këto biznese. Janë duke u mbyllur masivisht. Nëse doni bashkëpunim të ulemi bashkë dhe të shohim se si mund ta ndihmojmë biznesin e vogël, si mund t’i themi stop ekonomisë së krimit, ekonomisë së drogës, të cilat janë duke mbytur çdo shans që kanë bizneset për të mbijetuar”,- sqaroi Tabaku.
