Pas një dominimi 10-vjeçar të Ronaldos dhe Mesit, duket se gara për Topin e Artë është më e ndezur se kurrë. Pavarësisht faktit se ngelen ende disa muaj, një dorë të madhe në dhënien e këtij çmimi e jep padyshim edhe Botërori.
Pikërisht te ky i fundit kanë dështuar edhe protagonistët absolutë të Topit të Artë, dy yjet që kanë pushtuar prej shumë kohësh botën e futbollit, pasi Ronaldo është eliminuar me Portugalinë dhe Mesi me Argjentinën. Tashmë vëmendja është e përqëndruar te futbollistë të tjerë, të cilët janë duke e vazhduar aventurën e tyre në turneun që po zhvillohet në Rusi.
Luka Modriç është një prej favoritëve kryesorë të këtij çmimi, pasi fitimi i “Champions League” dhe arritja të paktën në gjysmëfinalen e Botërorit me Kroacinë, i jep atij pikët e mjaftueshme për të kryesuar listën.
Më pas janë edhe dy yjet francezë të cilët kanë shkëlqyer dhe bërë diferencën sa herë kanë mundur në fushën e lojës. Grizman nga njëra anë me sezonin e tij te Altetiko Madridi dhe me paraqitjen në Botëror, ndërsa Mbape në tjetrën që pavarësisht se PSG nuk ka marrëdhënia të mira me “Champions League”, gjithmonë arrin ta diferencojë veten nga të tjerët.
Një tjetër yll i ri ka lindur në Angli dhe ai është padyshim Herri Kejn. Pas një sezoni fantastik me Totenhemin, këtë herë sulmuesi anglez është pretendenti kryesor për t’u shpallur si golashënuesi më i mirë i Botërorit, por edhe një nga favoritët edhe për të fituar Topin e Artë.
Nëse Belgjika do të arrinte në majën e suksesit në Rusi, duke e fituar Botërorin, atëherë do të ishin tre emra të mundshëm belgë që mund t’i shtoheshin listës. Hazard, De Bryne dhe Lukaku, këta janë lojtarët që kanë arritur të bëjnë veçohen jo vetëm në Rusi, por edhe në klubet e tyre europiane ku ata aktivizohen. Por për të dalë në një përfundim më të saktë, duhet të presim për të zbardhur emrin e fituesit të turneut që është duke u zhvilluar në Rusi.
