Ministri i Brendshëm i Italisë, Matteo Salvini, synon parandalimin e hyrjes së emigrantëve të tjerë në Itali dhe i ka pritur me dyshim përpjekjet e kancelares gjermane Angela Merkel për një zgjidhje të përbashkët evroipane.
Në intervistën me të përjavshmen Der Spiegel në Romë, Salvini vë në dyshim edhe vetë ekzistencën e Evropës së bashkuar në të ardhmen e afërt.
DER SPIEGEL: Zoti Ministër, Kancelarja Angela Merkel do të donte të kthente mbrapsht azilkërkuesit që janë regjistruar në Itali por që kanë shkuar në Gjermani. Si është kjo për ju?
Salvini: Zonja Merkel ka thënë që Italia nuk duhet lënë vetëm. Tani, duhen parë pasojat. Ne jemi në vend të dytë, pas Gjermanisë, për numrin e refugjatëve që kemi pranuar. Kemi mbi 140 mijë raste azili, nuk mund të pranojmë asnjë rast më tepër. Përkundrazi, do të donim të hiqnim ca.
DER SPIEGEL: Me këtë pozicion ju mund të kontribuoni në fundin e Merkelit si kancelare.
Salvini: Ne kemi nevojë për partnerë të besueshëm në Gjermani. Personalisht, nuk dua të shoh krizë atje apo rënien e qeverisë. Ndonëse pikëpamjet tona politike, dhe jo thjesht për refugjatët, janë shumë larg njëra-tjetrës. Kjo vlen për politikën ekonomike, reformën bankare dhe suficitin e Gjermanisë në tregtinë e jashtme.
DER SPIEGEL: Keni linjë direkt komunikimi me kancelaren?
Salvini: Jo, nuk e kam pasur këtë nder. Unë flas me ministrin e brendshëm Horst Seehofer.
DER SPIEGEL: Ju keni folur për marrëveshje me Seehofer dhe homologun austriak. E megjithatë, të dy duan të kthejnë mbrapsht refugjatë në Itali.
Salvini: E vërtetë. Të dy flasin për mbrojtjen e kufijve dhe dëbimin e atyre që nuk kanë të drejtë azili. Por qëllimi ynë i përbashkët nuk është thjesht ai i imponimit mbi Brukselin të shpërndarjes së refugjatëve, por kryesisht mbrojtja e kufijve të jashtëm të BE. Një sistem si ai me Turqinë në juglindje duhet vendosur edhe në Evropën jugore.
DER SPIEGEL: Marrëveshja juaj me ministrin e brendshëm gjerman, me pak fjalë, kufizohet në mbrojtjen e kufijve të jashtëm. Po për dëshirën e tij për të kthyer refugjatët në Itali?
Salvini: Nuk kemi nevojë që të na vijnë. Kemi nevojë që të largohen nga ne.
DER SPIEGEL: Keni folur për këtë me zotin Seehofer?
Salvini: Jo, por Kryeministri Giuseppe Conte ka mandatin të deklarojë se problemi i Italisë është se kemi me bollëk, nuk kemi nevojë për kthime. Në këtë pikë, pozicioni ynë do të jetë krejt i qartë.
DER SPIEGEL: Cili në qeverinë italiane do të vendosë për pozicionin e vendit në samitin e BE në Bruksel?
Salvini: Kryeministri Conte.
DER SPIEGEL: Seriozisht?
Salvini: Po. Luigi Di Maio dhe unë jemi në akord të plotë me të. Ai ka mandatin të thotë “po” ose “jo” në Bruksel, të marrë pjesë ose të ngrihet e të ikë.
DER SPIEGEL: Megjithatë, të gjithë thonë se ju jeni anëtari më i rëndësishëm i qeverisë…
Salvini: Ju po më mbiblerësoni. Nuk duhet ta ekzagjerojmë.
DER SPIEGEL: Cili do të jetë pozicioni i qeverisë italiane për çështjen e refugjatëve?
Salvini: Ne, ministria e brendshme dhe ministria e jashtme, bashkë me kryeministrin, kemi përgatitur një dosje për takimin përgatitor të së dielës, të cilën e ka Giuseppe Conte (Vini re: Kjo intervistë është bërë para mini-samitit të së dielës, thirrur nga Merkel). Por ai nuk po shkon në Bruksel me një mision që duhet ta përmbushë. Ai e ka vetë në dorë, dmth mund të thotë “jo” nëse e sheh të arsyeshme.
DER SPIEGEL: Kjo do të thotë që vendimi mbetet i hapur?
Salvini: Po, por ndryshe nga e kaluar, marrëveshja me Italinë nuk është e garantuar nga jashtë.
DER SPIEGEL: Ka ende hapësirë për bisedime?
Salvini: Ne jemi të përgatitur të bisedojmë, pikë për pikë.
DER SPIEGEL: Si përputhet pozicioni juaj mbi refugjatët me draftet franko-gjermane, pjesë të të cilave tashmë janë bërë publike?
Salvini: Draftet e shkruara paraprakisht nga vende të tjera dhe më pas të dërguara rreth e rrotull me email nuk përputhen me mënyrën tonë të punës. Kjo gjë ose bëhet së bashku, ose nuk bëhet fare. Për më tepër, nuk më pëlqen rendi i adresimit të gjërave. Fokusi në projekt-dokument është kryesisht mbi deportimin e menjëhershëm në Itali të atyre që zbarkuan fillimisht në brigjet tona. Dhe vetëm më pas vjen adresimi i mbrojtjes së kufijve të jashtëm. Për ne, përparësitë janë ekzaktësisht në kahun e kundërt.
DER SPIEGEL: Cili është thelbi i konfliktit?
Salvini: Kur dikush në BE thotë se italianët fillimisht duhet të kujdesen për gjithçka e më pas ne do të ndihmojmë, atëherë unë them: Së pari na ndihmoni e pastaj mund të flasim për pjesën tjetër, për shpërndarjen e refugjatëve por edhe për bashkimin bankar, borxhin, etj.
DER SPIEGEL: Ju thoni se anijet e operuara nga OJQ-të, përfshirë disa nga Gjermania, duhet të largohen nga ujërat pranë Libisë?
Salvini: Pa diskutim, po. Ato përkrahin trafikantët e emigrantëve dhe nxitin kalimin e tyre.
DER SPIEGEL: Dhe kush duhet ta bëjë punën që bëjnë OJQ-të?
Salvini: Rojet detare të Libisë, Tunizisë dhe Egjiptit.
DER SPIEGEL: E konsideron Italia veten si pjesë e “Boshtit të Vullnetit”? Do të ishit në favor të instalimit të pikave të para të kontrollit në vendet jo-anëtare të BE në Ballkan?
Salvini: E keni fjalën për ngritjen e pikave të parandalimit jo vetëm në Afrikën Veriore por edhe në Ballkan? Po.
DER SPIEGEL: Kohët e fundit e keni quajtur presidentin francez Emmanuel Macron “arrogant”. Pse jeni i mërzitur me të?
Salvini: Francezët na kanë bërë leksione morali, e megjithatë, sipas statistikave, ata duhej të kishin pranuar prej kohësh 9 mijë azilkërkues nga Italia. Edhe sot, roje kufiri të armatosur patrullojnë kufirin me Italinë, në Ventimiglia. Është e drejta e tyre ta bëjnë, vetëm se duhet të mos na bëjnë më leksione.
DER SPIEGEL: Tani duket sikur BE do të jetë më i përçarë se kurrë në samitin e Brukselit. Ju shqetëson kjo gjë?
Salvini: Muajt e ardhshëm do të vendoset nëse Evropa do të ketë ende një të ardhme në formën aktuale ose nëse e gjithë kjo gjë do të jetë bërë e pakuptimtë. Nuk është thjesht për buxhetin e shatë viteve të ardhshëm. Vitin tjetër kemi zgjedhjet e reja për Parlamentin Evropian. Brenda një viti do të shohim nëse Evropa e bashkuar ekziston ende apo jo.
