Nga Boldnews.al
Tirana përmbytet nga vetëm 20 minuta shi, duke sjellë kaos në lëvizjen e qytetarëve dhe dëme në disa biznese të vogla. Ndonëse kryebashkiaku Erion Veliaj erdhi nga Spanja me një “kupë” në duar, të çmimit për hapësirën më të mirë publike të sheshit Skënderbej, shiu i ka nxjerrë të palarat Tiranës së “nëntokës”, që nuk mundi të përballojë intesitetin e pak minutave reshje. Përmbytje ka pasur edhe në Sheshin Skënderbej nga bllokimi i disa kanaleve nëntokësore, ndërsa situate ka qenë alarmente në disa lagje të Tiranës.
Qindra puseta në Tiranë janë të bllokuara dhe rrjeti i nëntokës, veçanërisht tubacioneve të ujërave janë tërësisht jashtë funksionit. Bashkia e Tiranës është kujdesur të të bëjë “makiazh sipërfaqësor” në shtrimin e trotuarëve, vijëzimet në rrugë, apo pikturat në muret e pallateve pranë akseve kryesore.
Bashkia e kryeqytetit është më e pasura në të gjithë vendin, ku buxheti i saj arrin në 120 milionë euro në total dhe zërin kryesor të të ardhurave e zë pikërisht taksa që i vendoset qytetarëve. Kjo shumë e madhe në duart e Lali Erit duket se nuk shkon në investime serioze dhe të domosdoshme, siç është rrjeti i kanalizimeve apo ndërtimi i katër kolektorëve kryesorë që do të mundësonin që Tirana të mos përmbytej.
Qytetarët jo vetëm detyrohen të paguajnë taksat një më një, por në buxhetin e bashkisë, rreth 3.3 milionë euro sigurohen vetëm nga parkimet me pagesë, të cilat janë shtrirë në çdo cep të Tiranës. Paçka buxhetit të lartë, rrjeti i kanalizimeve mbetet mjaft i amortizuar dhe për më shumë bashkia nuk ka asnjë projekt konkret për të normalizuar situatën. Por diçka është e garantuar, Lali Eri po pret shiun e radhës për tu shfaqur në ndonjë pusetë afër, duke qëndruar në shi me mëngët përveshur, vetëm për tu fiksuar në një kronikë televizive…
Përqëndrimi i Veliajt në punët e Tiranës është në krijimin e sa më shumë trojeve për të lëshuar lejet për ngritjen e kullave shumëkatëshe. Shtatë kullat që pritet të ngrihen pranë Teatrit Kombëtar dhe dy të tjera tashmë të miratuara janë “investimi” serioz i bashkisë së kryeqytetit. Sa për përmbytjen fajin ia lenë reshjeve të shiut… Tirana përbytet edhe në verë.
