Mohamed El-Shenawy, portieri i Egjiptit ishte protagonist absolut në sfidën ndaj Uruguait, ku bëri pritje të panumërta ndaj kundërshtarit dhe ndihmoi skuadrën e tij të humbë me vetëm një gol, i cili erdhi në minutën e fundit të ndeshjes.
Tifozët dhe paneli i specialistëve votuan pikërisht për portierin egjiptian si “Man of the match”, apo “Njeriu i ndeshjes”, por Mohamed El-Shenawy refuzoi të shkojë të marrë çmimin simbolik.
Kjo pasi ky çmim sponsorizohet nga prodhuesi amerikan i pijeve alkoolike, Budweiser dhe përfshin edhe një shishe birre. Portieri egjiptian refuzoi të marrë çmimin për motive fetare, por këtu FIFA nuk u gjet e papërgatitur, pasi vendosi të heqë shishen e birrës dhe të censurojë logon e kompanisë amerikane, që El-Shenawy të afrohej në ceremoni.
FIFA raportohet të ketë llogaritur më herët këtë detaj, pasi përveç Egjiptit, në Botëror marrin pjesë edhe shtete të tjera islamike, si Tunizia, Irani, Arabia Saudite, etj.
