Në disa dyqane në Gjenevë të Zvicrës po shiten bluza të Serbisë, që kanë hartën e këtij shteti por të përfshirë edhe Kosovën.
Ky incident nuk ka kaluar pa u vënë re, madje ka folur edhe trajneri i Kosovës, zvicerani Bernard Challandes. Ai thotë se po ecte në qytet dhe pa rastësisht në një dyqan, pjesë e rrjetit “Dosenbach”, një bluzë të Serbisë dhe hartën e saj së bashku me Kosovën.
“A e di ‘Dosenbach’ se ne jemi një shtet i pavarur që prej vitit 2008? Dyqani po provokon shqiptarët e Kosovës”, ka thënë trajneri zviceran i Kosovës.
Pas këtyre ankesave, rrjeti i dyqaneve ‘Dosenbach’ ka kërkuar falje.
“E kuptojmë që klientët tanë kosovarë janë të zemëruar. Reaguam menjëherë dhe hoqëm nga raftet të gjitha bluzat. Ata që kanë blerë një artikull të tillë, do të rimbursohen ose do t’u jepet një produkt tjetër”, tha zëdhënësi i kompanisë. Rrjeti i dyqaneve shtoi se nuk kishte asnjë ankesë më parë, ndërsa tha se bluzat në fjalë janë të markës Kappa.
Në Zvicër jetojnë dhe punojnë prej vitesh një numër i madh i shqiptarëve të Kosovës.
