“Nëntorin” e njeh, e ka dëgjuar dhe kënduar e gjithë Rusia dhe kjo nuk përbën më lajm. Arilena Ara është artistja që një vit më parë ka shëtitur pothuaj të gjitha qytetet më të mëdha të këtij vendi, nëpër skenat e të cilëve ka kënduar bashkë me publikun “Nëntorin”, në disa variante. Një prej këngëve më të dëgjuara në arenën ndërkombëtare të Arilenës, edhe pse ka kaluar më shumë se një vit e gjysmë nga prezantimi i saj i parë, është njëlloj e dëgjuar nëpër eventet më të rëndësishme të muzikës.
Ndryshe nga ç’ndodh zakonisht me këngëtarët e njohur, që famën e tyre duan ta shtrijnë në Perëndim, për Arilenën, gjithçka fillon nga Lindja. Kështu tha ajo në një intervistë të pak kohëve më parë. Dhe me Rusinë, pa asnjë dyshim, i ka fituar të gjitha pikët.
Krahas shumë artistëve që e kanë ndarë dhe e kanë përgëzuar “Nentorin”, edhe modelja e famshme ruse, Alena Shishkova, e cila numëron më shumë se 6.2 milionë fansa në Instagramin e saj, ka ndarë mbrëmjen e kaluar një video duke dëgjuar këngën e famshme të artistes shqiptare: “Më pëlqen shumë kjo këngë”, – ka thënë Shishkova duke shijuar tingujt e këngës shqiptare.
Alena, vazhdimisht poston foto e video nga këngëtarët e saj të preferuar, por rasti i Arilenës nuk është si të gjithë. Artistja shqiptare ka nisur turin e saj europian dhe pas disa javësh do të rikthehet në Rusi për të qenë pjesë e artistëve që do të performojnë në koncertet gjatë Kampionatit Botëror.
