“Gazetaria etike duhet të jetë normë dhe jo përjashtim”. Me këtë mesazh iu drejtua sot ambasadorja e BE-së në vendin tonë, Romana Vlahutin konferencës së Këshillit Shqiptar të Medias që u mbajt në ambientet e Hotel Tirana.
Vlahutin nënvizoi se gazetarët që ngrenë zërin për standardet etike duhet të mbështeten dhe jo të margjinalizohen. Për kryetaren e delegacionit të BE-së në Tiranë, gazetaria e mirë ka të bëjë me përgjegjësinë për ta përdorur lirinë e shprehjes për të thënë vetëm të vërtetën.
Sipas diplomates, ndryshimi drejt gazetarisë etike dhe të bazuar në fakte duhet të vijë nga ju, në praktikën e përditshme të punës suaj. Është një çështje respekti për profesionin dhe për shqiptarët.
“Është zhgënjyese dhe shumë domethënëse”, theksoi Vlahutin duke iu referuar faktit që shumica e medieve kishin vendosur të mos e mbulonin konferencën e sotme mbi standardet etike gazetareske.
