Minatorët e mbledhur sot para kryeministrisë dhe që i përkisnin thuajse të të gjitha grupimeve sindikaliste kanë deklaruar se nuk është nevoja aspak të përplasen me Policinë pse nuk ua lejon protestën, por se për këtë po i detyron thjesht dhe vetëm heshtja makabre e Qeverisë dhe një institucion i pushtuar nga hajdutë dhe të korruptuar, Instituti i Sigurimeve Shoqërore.
Kreu i njërës prej sindikatave, Fiqiri Xibri deklaroi se do t’i vëmë flakën ISSH-së, ndërkohë, komisioni i grevës ka paralajmëruar se të martën do të nisin grevën pa afat deri në grevë urie.
“Ju falënderoj të gjithëve që jeni këtu. Pavarësisht se këtë protestë nuk e organizuam ne, rëndësi ka që minatorët të jenë të gatshëm për të luftuar për të drejtat e veta. Që minatorët të luftojnë për dinjitetin e tyre, pavarësisht ngjyrave të partive apo erërave të sindikatave.
Nuk ka rëndësi se kush është në qeveri PS apo PD, nuk ka rëndësi se cila është sindikata që përfaqëson sot ose nesër, ose dje, rëndësi ka që ne të jemi të gatshëm për të mbrojtur veten tonë, dinjitetin tonë, gjakun tonë që e kemi lënë nëpër miniera dhe qeveritë nuk e njohin.
Tre muaj më parë ne ishim këtu dhe bëmë sherr të panevojshëm. Ç’nevojë kemi në minatorët të përplasemi me policinë? E vetmja nevojë është heshtja makabre e qeverisë.
Në qoftë se janë humanë, duhet të bëjnë transparencën e hajdutëve atje në ISSH sepse ISSH është kthyer në bandë korrupsion dhe akoma nuk ka filluar puna për të pastruar skemën nga hajdutët.
Ka 25 vjet, por të paktën 10 vjet që ne protestojmë dhe qeveritë na thonë nuk kemi para. Si nuk keni para more zotërinj, është leku jonë, është gjaku e djersa jonë. E hanë hajdutët që marrin pensione false. Jemi dënuar ne për protesta, ndërkohë që nuk dënohen hajdutët. Fajtorët numër një është politika, janë qeveritë që përkrahin bandat. Në qoftë se qeveria ka edhe gurin edhe arrën dhe ka paratë tona për t’i përdorur kundër nesh. Edhe ne kemi armën tonë, zemrën tonë, dinjitetin tonë dhe bashkimi jonë. Nuk ka rëndësi se kush e organizon, të jemi të gjithë bashkë, të luftojmë të gjithë bashkë dhe radhën tjetër nuk largohemi më pa e realizuar statusin. Do i vëmë flakën Institutit të Sigurimeve Shoqërore”, deklaroi Xibri.
Nikoll Gjoka përfaqësues i Konfederatës së Sindikatave të Shqipërisë tha se të martën të gjithë minatorët do të jenë në protestë. “Ditën e martë që vjen na shtohet edhe një sindikatë tjetër, ajo e minatorëve 1991. Unë e falënderoj Fiqiriun dhe i them se do na kesh mbështetje ditën e martë. Ne do të jemi këtu deri sa qeveria të vendosë për statusin e minatorëve. Ne kërkojmë drejtësi jo lëmoshë. Na takon për kontributin që kemi dhënë. Do qëndrojmë para kryeministrisë pa lëvizur. Do shkojmë deri në grevë urie”, deklaroi ai.
