Në intervistën e dhënë për kanalin në “youtube” të FSHF-së trajneri Christian Panucci është pyetur dhe për mungesën e kapitenit Ansi Agolli dhe a ka shanse që mbrojtësi i majtë të rikthehet në Kombëtare, pas momentit jo të mirë që po kalon ky repart.
Tekniku italian i ka “mbyllur derën” Agollit duke thënë se është 37-vjeç dhe pa perspektivë.
“Agolli është një futbollist 37-vjeçar, që do të thotë se në perspektivë nuk mund të na ndihmojë, ndaj duhet gjetur një zgjidhje tjetër”.
Panucci gjithashtu u pyet edhe për lënien jashtë të Armando Sadikut.
“Në katër muajt e fundit, Cikalleshi ka luajtur shumë më tepër se Sadiku. Ishte e drejtë që të thërrisja atë që kishte më shumë minuta në këmbë. Por në ardhmen, nëse do të luajë, do të grumbullohet”, u shpreh tekniku italian.
