Sezoni fantastik i Lazios nuk u “kurorëzua” me kualifikimin në Ligën e Kampionëve, por çmimet që vazhdojnë të marrin lojtarët e drejtuesit tregojnë sa pozitiv ka qenë ky kampionat për bardhekaltrit.
Të martën e kaluar ishte radha e Çiro Imobiles, tashmë e Igli Tares.
Drejtuesi sportiv shqiptar ka fituar mirënjohjen “Football Leader” si zbuluesi më i mirë i vitit dhe duke qenë prezent në ceremoninë dorëzimit të çmimeve, për “Mediaset Premium” e “Sky Sport”, dha këto deklarata: “Imobile? Kam dëgjuar shumë variante lidhur me të ardhmen e tij, unë di të them se ai ndihet mirë në Romë. Milinkoviç-Saviç? Klubi nuk e ka nxjerrë në shitje”.
Duke u ndalur, me një koment të shkurtër, te Lazio-Inter (sfida e humbur 2-3 nga lacialët në javën e fundit të kampionatit): “Po lëpijmë akoma plagët, më dhemb akoma”.
