Cristiano Ronaldo thotë se një largim i mundshëm i tiji nga Reali nuk është i lidhur me paratë, por në fakt mediat spanjolle mendojnë se kjo është arsyeja kryesore.
Gazeta “AS” shpjegon atë që ka ndodhur nga viti i kaluar dhe deri tani me kontratën e portugezit, i cili duket se ka ngelur i zhgënjyer nga drejtuesit për faktin se nuk e kanë mbajtur fjalën për rinovimin.
Florentino Perez tha se pas finales së Cardifit do të ulet të flasë me Ronaldon për përmirësimin e kushteve të kontratës dhe ka pasur kontakte mes Hoze Angel Sançezit (drejtori i përgjithshëm i Realit) dhe Jorge Mendezit (agjentit të Ronaldos).
Këtij të fundit nuk i ka shkuar kurrë ndërmend që lojtari i tij do të largohej nga Madridi. Palët kanë folur gjatë kësaj kohe me njëri-tjetrin dhe kishin rënë dakord se në fund të sezonit do të kishte një rritje të pagës vjetore, e cila mund t’i afrohej asaj të Neymarit (30 milionë euro).
Mendez nga ana tjetër e kishte vlerësuar këtë lëvizje që po bënte klubi.
Ronaldo në fakt mbeti i pakënaqur me kohën që po kalonte dhe Perez nuk po e rinovonte kontratën e tij, ndërsa në muajin janar kishte refuzuar një lloj kontrate, e cila nuk përcaktonte fiks pagën vjetore.
Ronaldo do të përfitonte rrogë më të lartë në bazë të trofeve që do të fitonte. Por kjo gjë e la të pakënaqur portugezin, i cili e refuzoi dhe mendoi se kjo ishte mungesë respekti e klubit ndaj tij.
