Prej më shumë se një viti marijuana light është e tregtueshme në të gjithë territorin italian.
Kultivimi, prodhimi e shitja e saj bëhej deri më tani me anë të një autorizimi të veçantë nga autoritetet italiane.
Ndërsa kultivimi i saj për qëllime terapeutike bëhej nga shteti italian në një stabiliment farmaceutik kimik e ushtarak në qytetin e Firences.
Por prej ditës së sotme Ministria Italiane e Bujqësisë me një dekret të veçantë ka marrë vendimin që kultivimi i marijuanës së lehtë të bëhet pa autorizimin e nevojshëm të autoriteteve, por me kusht që përqindja e substancës THC të jetë në limitet 0.2%-0.6% siç është parashikuar dhe nga normativa europiane.
Substanca THC (tetraibrocanabinolo) prodhohet nga lulet e kanabisit dhe ka aftësinë të ndikojë në gjendjen mendore të njeriut.
Sipas vendimit të Ministrisë italiane të Bujqësisë në rast se verifikohet kultivimi i bimëve të marijuanës në nivel më të lartë se 0.6% atëherë autoritetet gjyqësore procedojnë me sekuestrimin e kësaj bime dhe shkatërrimin e plantacioneve të saj.
Biznesi i kultivimit të bimëve të kanabisit me qëllim prodhimin e marijuanës së lehtë është një sektor gjithnjë e në rritje në ekonominë italiane.
