Nga Boldnews.al
Taulant Balla, njeriu hije i Kryeministrit Edi Rama, ka lëshuar dy “perla” në emisionin “Tonight” të Ilva Tare në Ora News, mbrëmjen e së hënës. Sipas Ballës, Partia Demokratike ka ngritur një grup ish-policësh për të përgjuar një pjesë të maxhorancës. Si edhe, një gjyqtar “i korruptuar” ka shkuar në Gjykatën e Kasacionit në Itali dhe i ka siguruar Partisë Demokratike vendimin e dënimit për vëllain e Fatmir Xhafaj.
Me shumë mundësi, edhe Balla e kupton që këto deklarime janë tërësisht pa lidhje me realitetin. Por, në ngasjen e madhe për të mbrojtur qeverinë nga skandali i radhës që e lidh me narko-trafikun, Sekretari i Përgjithshëm i Partisë Socialiste dhe kreu i grupit parlamentar të kësaj force politike, e sheh veten të detyruar të luajë rolin e tij.
Për pretendimin e parë të Ballës, sipas të cilit PD ka ngritur strukturë për përgjimin e qeverisë. Kjo është një akuzë jo thjeshtë qesharake, por as e besueshme. Opozita në Shqipëri nuk ka akses në strukturat e inteligjencës dhe institucionet që ndjekin procedurialisht hetimet. Të gjithë këto institucione janë nën kontrollin e qeverisë së Edi Ramës. Nga ana tjetër, përgjimet e paligjshme, në çdo kohë, mund të realizohen vetëm me ndihmën ose dijeni e një pjese të qeverisë.
Që të realizohen përgjime të paligjshme, duhet më së pari të sigurohen pajisjet e duhura, të cilat hyjnë në territorin shqiptar në mënyrë të kontrolluar nga autoritetet e posaçme. Edhe në një rast të identifikuar përgjimesh të paligjshme, pajisja, e cila quhej Imsi-Chathcer hyri në Shqipëri, duke shkelur procedurat, por nëpërmjet punonjësve të Policisë. Ajo pajisje e paligjshme dyshohet se është përdorur nga zyrtarë të lartë të Policisë për të përgjuar opozitën dhe një pjesë të qeverisë së Edi Ramës.
Pretendimi i dytë i Ballës, pra që një gjyqtar “i korruptuar” shqiptar ka gjetur vendimin e dënimit të Agron Xhafaj, për llogari të politikës së Partisë Demokratike, është më së paku absurd. Nëse Balla do t’i referohej Fatmir Xhafës, do të ishte i qartë se vendimi i dënimit me 7 vjet e dy muaj burgim për “Gonin” gjendet on-line në faqen e Gjykatës së Kasacionit të Italisë. Kështu u shpreh, të paktën, ministri i Brendshëm, kur deklaroi se “opozita nuk ka bërë asnjë zbulim, pasi vendimi gjendet lehtësisht online”.
