Mbledhja e Komisionit të Ekonomisë është ndërprerë ditën e sotme. Ka qenë kryetari i Komisionit, Erjon Braçe, i cili ndërpreu mbledhjen dhe nxori jashtë të gjithë gazetarët.
Kujtojmë këtu se një ditë më parë, Braçe nxori nga Komisioni i Ekonomisë dy gazetarët Esiona Konomi dhe Marsela Karapançon. Në lidhje me këtë, që në nisje të komisionit ka reaguar deputetja e PD, Jorida Tabaku, e cila i është drejtuar Braçes se keni qenë vetë gazetar dhe i kuptoni mirë vështirësitë e tyre.
“Braçe, ne u larguam dje nga Komisioni dhe nuk ishim në pjesën e dytë të tij. U njohëm nga media me faktin se dy gazetare të terrenit që janë prezent këtu në Komision ditët e fundit, ju i kërkuat të largohen nga salla. Ju duke qenë gazetar, i kuptoni mirë vështirësitë e tyre për më tepër që të dyja janë zonja. Nuk është në standardin e asnjërit prej nesh këtu që të largojmë gazetarët. Unë bisedova me to dhe kuptova se ishin tepër të prekura nga ky gjest. Janë të dyja profesioniste. Të dyja nuk e mbulojnë Partinë Demokratike. Asnjëra prej tyre. Nuk më duket normale”, – u shpreh Tabaku.
Më tej, kryetari i Komisionit i ka kërkuar dhe deputetit të PD-së, Agron Shehaj të dalë jashtë, pasi e akuzon për fyerje gjatë mbledhjes. Situatën e ka tensionuar më shumë edhe deputeti Aldo Bumçi i PD. Bumçi nuk është anëtar i Komisionit të Ekonomisë dhe Braçe nuk ia dha fjalën. Në këto kushte kryetari i komisionit nxori të gjitha kamerat jashtë dhe të ndërpreu mbledhjen.
“Dilni jashtë, ndërpritet mbledhja”, – u shpreh Braçe.
