Pala greke nuk ka lejuar sot kapitenin e ekipit shqiptar të futbollit Antigonea që të kalojë kufirin për në Greqi.
Raportohet se, në mënyrë arbitrare dhe të pajustifikuar ata kanë vendosur kryq në pasaportën e kapitenit të ekipit.
Ekipi amator i futbollit ishte nisur për një ndeshje miqësore me një skuadër amatore në ishullin e Skopelos në Greqi, me ftesë të ekipit vendas.
Policia nuk i ka dhënë asnjë lloj shpjegimi dhe arsyetimi, por i ka ndaluar hyrjen për 72 orë kapitenit të ekipit.
Ftesa e ekipit grek ishte e vlefshme që nga sot deri të dielën. Deri tani nuk ka asnjë reagim nga ana e policisë kufitare të Gjirokastrës.
Ekipi i Antigonesë duket se e kishte marrë shumë seriozisht miqësoren me ekipin grek, aq sa kishte kohë që kishte nisur përgatitjet.
Në datën 14 maj, ekipi shqiptar shkruante në Facebook: “Ne kuader te pergatitjeve per Skopelos, ekipi zhvilloi nje ndeshje miqesore diten e djeshme: FT Antigonean vs Bledi’s Team
6 – 4″.
Antigonea e kishte parlajmëruar që më 4 maj miqësoren, kur bënte të ditur: ” Vazhdon “Turneu i Miqesoreve”… FT ANTIGONEAN ben hapin e pare pertej kufijve. Ne daten 19 Maj, Sfinksat do te ulen ne ishullin grek te Skopelos ku do te zhvillohet nje ndeshje miqesore midis: Skopelos vs Ft Antigonean Ekipi eshte duke e pergatitur maksimalisht kete transferte !!!”.