Një kompani trenash në Japoni ka kërkuar falje për “shqetësimin” të shkaktuar ndaj udhëtareve, pasi një prej trenave është larguar nga stacioni 25 sekonda më herët.
Japonia ka një nga shërbimet më të përpikta hekurudhore në botë dhe kështu u konsiderua një incident i denjë për një deklaratë publike, për të kërkuar falje dhe për të nisur një hetim të brendshëm kur treni i orës 7.12 në stacionin Notogawa u largua në 7.11 e 35 sekonda.
Kompania bëri të ditur se treni, i destinuar për stacionin Nishi-Akashi në prefekturën Hyogo, arriti në stacionin tjetër pikërisht në “kohën e përcaktuar”.
Por, një zëdhënës gjithsesi e përshkroi incidentin si “të pafalshëm”, pasi disa udhëtarë nuk ishin në gjendje të hipnin në tren dhe një person u ankua tek një kujdestar i stacionit, i cili e referoi çështjen deri në selinë e JR-West.
Një incident i ngjashëm ka ndodhur vjeshtën e vitin e kaluar, kur një tren nga Tokio për në qytetin lindor Tsukuba u nis 20 sekonda herët, duke bërë që operatori i Tsukuba Express të kërkonte falje publike.
