Dy të rinjtë nga Vlora janë vënë në pranga pasi dyshohet se kanë djegur makinat e prindërve të tyre në fshatin Bunavi të vlorës, tek ‘Kthesa e Bushajve’.
Fillimisht, mjetet u deklaruan të vjedhura nga shtetasi N.A., 55 vjeç, banues në fshatin Babicë e Vogël, babai i njërit prej autorëve të ngjarjes, 25-vjeçarit Arsen Alimuçaj.
Edhe ndaj tij, policia nisi procedim në gjendje të lirë, pasi ka dhënë deklaratë të rreme përpara oficerit të policisë gjyqësore.
Ende nuk dihet arsyet që kanë shtyrë dy të rinjtë drejt këtij veprimi, ndërkohë që vijon puna për zbardhjen dhe dokumentimin e plotë të kësaj ngjarje.
INFORMACIONI I POLICISE
Strukturat Policore për Hetimin e Krimeve në Komisariatin e Policisë Vlorë, falë hetimeve të shpejta hetimore, kanë bërë të mundur identifikimin dhe vënien para përgjegjësisë ligjore autorët e ngjarjes së djeshme në fshatin Bunavi.
Në përfundim të veprimeve hetimore paraprake është kryer arrestimi i shtetasve:
Klemend Dautaj, 32 vjeç, banues në Vlorë
Arsen Alimuçaj, 25 vjeç, banues në fshatin Babicë e Vogël, Vlorë.
Shtetasit e mësipërm për motive ende të paqarta dyshohen se kanë djegur automjetin “Ford-Fugon”, në pronësi të shtetasit N.A., (babai Arsenit) dhe mjetin tip Volksëagen-Golf, në pronësi të shtetases R.D., (nëna e Klemendit).
Gjithashtu, do të hetohet në gjendje të lirë shtetasi, N.A., 55 vjeç, banues në fshatin Babicë e Vogël pasi ka dhënë deklaratë të rreme përpara oficerit të policisë gjyqësore.
Vijon puna për zbardhjen dhe dokumentimin e plotë të kësaj ngjarje.
Materialet hetimore i kaluan Prokurorisë së Rrethit Gjyqësor Vlorë, për veprat penale “Shkatërrimi i pronës me zjarr”, “Veprime që pengojnë zbulimin e së vërtetës” dhe “Deklaratat e rreme përpara oficerit të policisë gjyqësore”, të parashikuara nga nenet 151, 301, dhe 305/b të Kodit Penal.