Dy shqiptarët e arratisur nga porti i Piresë mbrëmjen e së mërkurës, gjatë transferimit për në burgun e Kretës, u gjetën nga forcat e policisë në një apartament në lagjen Nea Filadelfia të Athinës të premten. CNN grek ka bërë publike edhe pamjet e shtëpisë në të cilën u fshehën Xhuliano Halili dhe Alfons Doçi, i pari i dënuar me burgim të përjetshëm për vrasjen e një fëmije, ndërsa i dyti me 25 vite burg për trafik të lëndëve narkotike.
Ajo që ka tërhequr vëmendjen ka qenë pikërisht boja e zezë e shpërndarë në çdo cep të këtij apartamenti, ndërsa i gjithë ambienti ishte në një rrëmujë totale. CNN-i grek shkruan se ky apartament ishte marrë me qira nga një person i tretë disa kohë më parë, por nuk dihet se si kanë shkuar deri atje dy shqiptarët.