Samiti historik mes Donald Trump dhe Kim Jong Un, më 12 qershor në Singapor, do t’i kushtohet paqes në botë, sipas presidentit amerikan, megjithëse në nisje të mandatit të tij, shefi i Shtëpisë së Bardhë nuk kishte asnjë asgjë fije shprese për një çtensionim kaq të fortë të marrëdhënieve mes SHBA-së dhe Koresë së Veriut.
-Kërcënimet bërthamore-
Më 2 janar 2017, përpara marrjes së detyrës, presidenti i ri amerikan pohoi se Koreja e Veriut nuk do të ishte kurrë në gjendje të zhvillonte një armë bërthamore e aftë për të goditur territorin amerikan.
Mundësia diplomatike dukej fillimisht e përshtatshme me kontekstin. Në maj të vitit 2017, para fillimit të përshkallëzimit të tensioneve, Donald Trump u shpreh i gatshëm për të takuar liderin koreano-verior. ”Nëse kushtet do të ishin të përshtatshme për t’u takuar me Kim Jong Un, do ta bëja absolutisht. Do ta isha i nderuar ta bëja”, deklaronte ai.
Por, gjatë verës, Pheniani lëshoi dy raketa ndërkontinentale, Kim siguroi se gjithë territori amerikan ishte në rrezen e tij. Kjo pasohet me një krizë mes dy shteteve, kryesisht shënuar nga sanksione financiare amerikane dhe premtimi i Trumpit se do të përgjigjej me ”zjarr dhe tërbim” ndaj çdo sulmi koreano-verior.
Koreano-veriorët iu përgjigjen me kryerjen e testit të gjashtë bërthamor, pas së cilit ata pohojnë se kanë testuar me sukses bombën H.
-Ofendime personale-
Retorika luftarake e dy liderëve mori shpejt një kthesë mjaft agresive personale.
Në Asamblenë e Përgjithshme të Kombeve të Bashkuara në shtator 2017, Trump e cilësoi Kim si ”burri i vogël raketë”. Dy ditë më vonë, koreano-veriori iu përgjigj se ”do ta disiplinoj me zjarr palën amerikane”.
-Otto Warmbier i torturuar-
Në shtator të vitit 2017, ish-manjati i pasurive të patundshme akuzoi Phenianin për tortura që shkojnë përtej së imagjinueshmes ndaj Otto Warmbier. Ky student amerikan i burgosur në Korenë e Veriut në janar të 2016 për vjedhjen e një posteri propagandistik, iu dorëzua amerikanëve në gjendje kome në qershor të vitit 2017. Ai vdiq një javë pas riatdhesimit.
Uashingtoni vendosi atëherë t’i ndalonte shtetasit e tij për të udhëtuar në Korenë e Veriut dhe të rivendosë vendin në listën e shteteve që mbështesin terrorizmin.
-Kthesa olimpike-
Në shkurt të vitit 2018, gjatë Lojërave Olimpike Dimërore në Pyeongchang (Kore e Jugut) dy Koretë u afruan në mënyrë simbolike duke parakaluar së bashku në ceremoninë e hapjes, dhe në aspektin diplomatik me takimin e dy të dërguarve të posaçëm të dy shteteve.
Trump përshëndeti në atë kohë fillimin e çtensionimit të marrëdhënieve.
-Vizita e papritur e Pompeos-
Në cilësinë e drejtorit të CIA-s dhe përpara se të merrte drejtimin e diplomacisë amerikane, Mike Pompeo udhëtoi drejt Phenainit gjatë fundjavës së Pashkëve për të takuar presidentin Kim.
Më 8 maj, Trump bëri të ditur se sekretari i ri i Shtetit është sërish rrugës për në Korenë e Veriut. Ai u takua edhe një herë me liderin koreano-verior dhe u kthye në SHBA së bashku me tre ish-të burgosur amerikanë ku Uashingtoni i kishte kërkuar lirimin e tyre.
-Samiti historik-
Më 7 mars, këshilltari për sigurinë i presidencës koreano-jugore, Chung Eui-yong befasoi mbarë planetin duke njoftuar se Kim Jong Un fton në takim presidentin Trump.
Samiti mes dy liderëve më 12 qershor do të futet në analet e historisë.
Ky do të jetë takimi i parë mes një presidenti amerikan në detyrë dhe një udhëheqësi koreano-verior.
/AFP/
