Shoferi i kamionit që iu mori jetën dy shqiptarëve në Greqi edhe më parë ishte ndaluar nga policia, si përdorues i alkoolit. Pak ditë përpara se të ndodhte përplasja fatale që iu mori jetën dy shqiptarëve dhe një tjetër është e plagosur rëndë ai është ndaluar nga policia dhe nga kontrolli rezultoi se kishte konsumuar alkool.
Sipas mediave greke 64-vjeçarit nuk i ishte hequr patenta pasi ishte pak mbi kufirin e lejuar, kështu që ishte gjobitur me 200 euro.
Kamioni që drejtonte greku në orët e para të mëngjesit të së mërkurës kaloi barrierën ndarëse dhe goditi dy autovetura, që kalonin në krahun përballë të autostradës që lidh Pireun me Selanikun.
Prej përplasjes rezultoi se dy shtetas shqiptarë, Spiro Guri dhe Dhimitër Pabuko gjetën vdekjen e menjëhershme, ndërsa një tjetër shtetase shqiptare, 34-vjeçarja Balerina Guri ndodhet në spital në rrezik për jetën.
E motra e shoferit grek duke folur për mediat ka kërkuar falje, ndërsa ka treguar se 64-vjeçari konsumonte alkool pasi kishte kaluar dy tragjedi më parë. Ai kishte humbur djalin në aksident dhe një vëlla.
