Nga Boldnews.al
Për të gjithë ata që menduan se Edi Rama e kishte lëshuar përfundimisht ish-ministrin e tij të Brendshëm, Saimir Tahirin, sot, me largimin e kreut të Prokurorisë për Krime të Rënda, morën një përgjigje të qartë.
Kryeministri as nuk ka pasur dhe as nuk ka ndërmend që të lejojë arrestimin e ish-krahut të tij të djathtë. Jo për shkak të afërsisë që kanë pasur mes tyre, por më shumë për mesazhet e koduara të dërguara së fundmi nga Saimir Tahiri se, rrënimi i tij do të shoqërohet me rrënimin e vetë Edi Ramës dhe qeverisë së tij.
Për të zbutur tensionet mes miqve-armiq Rama-Tahiri, mesditën e së mërkurës mendoi Kryeprokurorja e Përkohshme, Arta Marku. Ajo, me një lëvizje që në fakt nuk ishte aq e befasishme, shkarkoi nga detyra drejtuesin e Prokurorisë për Krime të Rënda, Besim Hajdarmataj.
Prokuroria e Përgjithshme e justifikoi shkarkimin e tij me nevojën për rritjen e efiçensës në hetimet që po kryen në atë prokurori. Por në fakt, është e qartë se Hajdarmataj, i cili është një prej prokurorëve që kërkuan para 6 muajsh arrestimin e Saimir Tahirit, është lëvizur në momentin që ish-ministri i Brendshëm hoqi dorë nga imuniteti i deputetit dhe sot është një qytetar i thjeshtë.
Prej ditësh flitej në ambjente publike, përfshirë edhe politike, se Saimir Tahiri shumë shpejt do të përballej me prangat. Disa të dhëna të rëndësishme për hetimin kanë mbërritur së fundmi nga Greqia dhe Italia, të cilat mendohet se do të ishin të mjaftueshme për të bindur gjykatës që të firmoste arrestimin e ish-ministrit të Brendshëm, të dyshuar për përfshirje në organizatë kriminale narko-trafiku.
Por, shkarkimi i kreut të Prokurorisë për Krime të Rënda mund të kthejë situatën hetimore në pikën zero, duke i dhënë më shumë frymëmarrje Saimir Tahirit. Për këtë mendoi Arta Marku, e cila, pavarësisht se nuk asnjë tagër ligjor për këto shkarkime, sërish nuk ka hezituar për të vendosur firmën që lëviz nga detyra Hajdarmatën dhe vendos në atë post mikeshën e saj, Donika Prelën. Kjo e fundit mbante prej disa muajsh detyrën e kryeprokurores së Durrësit.
Pra, tashmë është e qartë që fati i dosjes së Saimir Tahirit po vuloset, nëpërmjet ndërhyrjes së dhunshme të politikës në vendimmarrjen e Kryeprokurores së Përkohshme, e zgjedhur vetëm me votat e maxhorancës së Edi Ramës.
Por, nuk duket se është vetëm kaq kjo situatë. Prokuroria për Krime të Rënda ka nën hetim edhe kreun e Bashkisë së Durrësit, Vangjush Dako dhe drejtuesin e OSHEE-së, Ardian Çela, të dy të dyshuar se kanë bashkëpunuar me grupe kriminale për sigurimin e votave gjatë zgjedhjeve të përgjithshme të vitit 2017.
Por, ndoshta këto çështje do të arkivohen njëherë e mirë me lëvizjet e fundit në drejtimin e Prokurorisë për Krime të Rënda. E vetmja çështje që mund të vijojë të mbetet e hapur pritet të jetë ajo kundër Adriatik Llallës. Ish-kryeprokurori u hetua nga Donika Prela, kur ishte në Prokurorinë e Durrësit. Para pak ditë kjo dosje kaloi për kompetencë në Prokurorinë për Krime të Rënda. Pra, edhe këtu do të hetohet sërish nga Donika Prela, e cila po konfirmohet si njeriu më i afërt i Kryeprokurores së Përkohshme, Arta Marku.
