Kompania ndërkombëtare e tregtimit të karburanteve, Gulf, njoftoi se ka ndërprerë kontratën me partnerin e saj shqiptar Sun Petroleum, pasi kjo e fundit nuk i ka paguar tarifën e licencës. Zëvendëspresidenti i Gulf Oil International, Frank Rutten, ka hequr të gjitha përgjegjësitë e grupit nga ajo që ka ndodhur në Shqipëri duke ja lënë fajin tërësisht kompanisë shqiptare, Sun Petroleum
‘Kjo është një situatë për të ardhur keq. Është e rëndësishme të kuptohet se Sun Petroleum Albania është një kompani e pavarur, të cilës Gulf i kishte dhënë një licencë për tregtimin e karburantit në Shqipëri nën markën e Gulf’, deklaroi numri dy i Gulf Oil International. Sipas tij, grupi Gulf ka dhënë licenca të ngjashme për shumë kompani të tjera anembanë botës, që të tregtojnë karburant nën markën e tij, por kjo nuk e lidh këtë kompani me përgjegjësi.
‘Ne kemi mësuar se kompania Sun Petroleum ka shitur një numër të konsiderueshëm kuponash të parapaguar konsumatorëve, të cilët tani nuk mund t’i konvertojnë dot ato në karburant. Ky veprim është bërë pa miratimin e Gulf Oil International. Meqenëse çështja është nën hetim, ne nuk mund të komentojmë më tej, por dua të theksojë se do të bëjmë çdo përpjekje për të mbrojtur markën Gulf’, -shtoi Rutten.
Sipas të dhënave nga prokuroria, kompania Sun Petroleum, e cila prej disa vitesh ka tregtuar karburant nën logon e Gulf, ka mashtruar mijëra qytetarë duke u shitur kuponë të parapaguar. Në total, dëmi i këtij mashtrimi, tek qytetarët dhe furnitorët llogaritet në rreth 2 milionë euro. Prokuroria ka shpallur në kërkim Alban Alikon, menaxherin shqiptar të Gulf, si i dyshuari kryesor për organizimin e kësaj skeme mashtrimi.
