Kukësi ka vuajtur këtë sezon për një bomber, sidomos gjysmën e dytë të sezonit, ku Bakaj është larguar dhe sulmuesi i ardhur nga kampionati portugez, Amido Balde ka qenë jashtë forme.
Në këto kushte, alternativa e vetme ka qenë Sindrit Guri, i cili e ka mbajtur i vetëm peshën e sulmit dhe realisht e ka bërë mirë punën e tij. Por, largimi i Gurit shihet si i sigurt, andaj Pakult dhe drejtuesit që merren me merkaton po studiojnë alternativat për zëvendësuesin.
LISTA E DËSHIRAVE – Në listën e dëshirave të Kukësit përfshihen lojtarë realisht të arritshëm.
REXHINALDO
I pari në radhë është Rexhinaldo, sulmuesi aktual i Laçit, i cili mbaron kontratën në fund të sezonit. Rexhinaldo është përfolur dhe më parë si një afrim i mundshëm te Kukësi, por transferimi nuk është kryer. Palët janë në bisedime dhe me shumë gjasa sulmuesi në përfundim të kampionatit do të bëhet pjesë e Kukësit.
SEBINO PLAKU
Alternativë e dytë për sulmin e verilindorëve është Sebino Plaku. Ish-sulmuesi i Skënderbeut ka zhvilluar një sezon të mirë e pëlqehet sidomos nga drejtori Nderim Nexhipi. Mosha e tij, 33 vjeç, është paksa problem për drejtuesit e klubit verilindor, por është Pakult ai që do të japë ose jo “OK”-in. Nga vlerësimi i trajnerit austriak do bëhen të gjitha veprimet e mëtejshme.
ERIK FLORES
Në korrik të vitit 2006, Kukë- si largoi “beniaminin” e tifozërisë nga ekipi, Erik Floresin. Kjo lëvizje e verilindorëve në atë kohë erdhi për shkak të kostos së madhe financiare që lojtari kishte, por edhe prej problemit në gju. Ndaj Kukësi mori këtë vendim në verën e dy viteve më parë, duke e cilësuar mbajtjen e tij si shpenzim të tepërt. Flores vijoi karrierën e tij në Brazil, por duket se dashuria mes palëve nuk ka përfunduar. Palët janë në negociata që fantazisti të rikthehet sërish te Kukësi.
Flores është një futbollist me të dhëna të jashtëzakonshme, i cili shkëlqeu me Kukësin në Europa Ligë, duke kaluar tre ture. Flores merrte një pagë neto prej 5 mijë eurosh në muaj, ndërsa në 30 ndeshje të luajtura e ka gjetur 6 herë rrjetën në sezonin 2015-2016 me Kukësin. Nëse marrëveshja do arrihet dhe Flores rikthehet te Kukësi, kjo shikohet si një lëvizje mjaft efikase e klubit.
