Nga Boldnews.al
Televizioni kombëtar Top Channel ka pyetur të martën Ambasadorin Amerikan, Donald Lu, lidhur me vonesën e krijimit të Këshillit të Lartë Gjyqësor dhe Këshillit të Lartë të Prokurorisë. Si pasojë e vonesës në krijimin e KLP-së, nuk është krijuar ende as prokuroria speciale antikorrupsion, SPAK.
Diplomati amerikan, në vijim të qëndrimeve të tij periodike, ka evidentuar si shkakun kryesor opozitën e djathtë, e cila ankimoi në Gjykatën Kushtetuese ligjin e Vetingut. Donald Lu e konsideroi si “sfidë të humbur” ankimin e opozitës. Si shkak të dytë për vonesën, ai rendit gjetja e kandidatëve të përshtatshëm nga radhët e juristëve jashtë sistemit të drejtësisë, të cilët do të aplikonin për këto struktura.
Pas këtij qëndrimi të diplomatit amerikan ngrihen disa pikëpyetje:
Së pari, për një televizion kombëtar si Top Channel duhet të pyesë ambasadorin amerikan për disa teknikalitete, të cilat tashmë publiku është në dijeni? Për më tepër, ambasadori Lu nuk është jurist që të ketë tagrin e përgjigjeve ligjore mbi çështjet që është pyetur. Natyrisht, ai ka dhënë suportin e tij për realizimin e Reformës në Drejtësi. Por mbështetja e tij ka qenë politike dhe Reforma është hartuar nga ekspertë, përfshirë edhe ata amerikanë të OPDAT-it amerikan
Së dyti, përse e kishte të nevojshme ambasadori që të ri-etiketonte opozitën si përgjegjëse për vonesën në Reformën në Drejtësi? Partia Demokratike ka shfrytëzuar mekanizmat e nevojshëm ligjorë për të shprehur kundërshtitë e saj lidhur me disa aspekte të antikushtetuetshmërisë së ligjit të Vetingut. Ankimi i Partisë Demokratike nuk u pranua nga Gjykata Kushtetuese dhe ligji nisi zbatimin siç ishte miratuar nga maxhoranca parlamentare. Por, i gjithë ky proces nuk mund të konsiderohet pengesë. Është një e drejtë kushtetuese, e cila u shfrytëzua nga opozita, si një grup i rëndësishëm interesi.
Së treti, përse u zgjodh kjo kohë që të pyetej ambasadori amerikan, kur krijimi i KLGJ dhe KLP nuk është më emergjente se sa bllokimi total i dy gjykatave më të rëndësishme-Gjykatës Kushtetuese dhe Gjykatës së Lartë?
Në median kryesore shqiptare tashmë është qartësuar idea se ambasadori Lu, më shumë se sa u përgjigjet pyetjeve të medias, kërkon prej tyre që të “përgatisin pyetjet” dhe më pas ai të përgjigjet. Pra, është një strategji tashmë e dukshme që ai zgjedh të përcjellë mesazhet e tij në një moment të caktuar dhe këtë e kamuflon sikur iu përgjigjet interesit mediatik.
Donald Lu zgjodhi të flasë në një kohë kur opinion publik shqiptar është tërësisht i përqëndruar tek mënyra se si do të votojë Këshilli Europian lidhur me negociatat për anëtarësimin e Shqipërisë në BE. Këto kohë, kryeministri Edi Rama është në vështirësi të mëdha, sidomos për të bindur skeptikët gjermanë, francezë dhe hollandezë se qeveria e tij ka ndërmarrë reforma që forcojnë demokracinë shqiptare. Autoritetet e vendeve kryesore të Bashkimit Europian janë shumë dyshues mbi vërtetësinë e deklaratave të Ramës.
Deputetë të rëndësishëm gjermanë kanë ngritur dyshime thelbësore mbi vullnetin e Edi Ramës për të forcuar pavarësinë e sistemit të drejtësisë. Dhe, në këtë situatë, shfaqet papritur Donald Lu dhe etiketon si përgjegjëse për vonesën në implementimin e saj….opozitën. njëlloj si Edi Rama.
Së fundmi, pikëpyetja kryesore është; kujt po i justifikohet ambasadori Lu për këto vonesa?
Diplomati amerikan është shfaqur si “kumbari” i Reformës në Drejtësi në Shqipëri. Ai u përfshi në një përplasje të hapur me opozitën shqiptare, e cila konstatoi se varianti i Edi Ramës do të bllokonte tërësisht sistemin dhe krijonte kushtet që drejtësia të ishte në duart e kryeministrit dhe maxhorancës socialiste.
Shqetësimet e opozitës së djathtë sot po konfirmohen. Institucionet më të larta të drejtësisë ose janë në kolaps të plotë, ose nuk janë krijuar ende. Një system i ndërlikuar ligjesh dhe rregullash ka shkaktuar amulli në mënyrën e funksionimit të gjykatave dhe prokurorisë.
“Kumbari” i Reformës, Donald Lu, në përfundim të mandatit të tij në Shqipëri, nuk do të kishte dashur që fati i produktit të mbështetur prej tij të ishte një fiasko. Pra, ai sot mund të konsiderohet si bashkë-përgjegjës me Edi Ramën për bllokimin aktual të sistemit të drejtësisë në Shqipëri. Ky rezultat negativ, me shumë mundësi, do ta shoqërojë në vijim të karrierës së tij. Ndaj, Donald Lu kërkon një fajtor- të cilin e gjen tek opozita e djathtë, edhe pse kjo e fundit, për shkak të numrave, nuk ka pasur asnjë mundësi kushtetuese për të ndikuar në Reformën në Drejtësi.
