“Unë jam si vera, bëhem më i mirë me kalimin e viteve”, – shprehet Zlatan Ibrahimovic për veten. Nuk ka faj, ai dhuron spektakël dhe klas kudo që shkon.
Nëse do të flasim për lojtarët me origjinë shqiptare, atëherë diçka e tillë mund të thuhet mjaft mirë për Hamdi Salihin.
Shkodrani po përjeton një rini të dytë në kampionatin austriak të Kategorinë së Dytë.
34-vjeçari është titullar dhe lider i skuadrës së tij të Wiener Neustadt. Ai ka shënuar 19 gola në 28 ndeshje duke qenë golashënuesi i dytë i kampionatit. I pari ka shënuar vetëm një gol më shumë se Salihi.
Në fakt, historia e Salihit në kampionatin nuk duket se do të ketë një fund të lumtur. Ekipi i tij në vitin 2018 ka patur një ecuri jo të mirë dhe ka patur shumë oshilacione. Skuadra e Wiener Nesutadt nuk po arrin të marrë rezultate pozitive.
Skuadra austriake humbi dhe ditën e djeshme në transfertë me rezultatin 2-1 kundër ekipit të Hartberg-ut. Një takim mjaft i rëndësishëm, pasi ishte një sfidë mes rivalësh direkt. Hartberg-u ndodhet në vendin e dytë.
Skuadra e shkodranit ka rënë në vendin e 4-ët me 3 pikë diferencë nga Ried-i i vendit të 3-të. Ky vend të jep mundësinë për të shkuar në “play-off”, por duket se ekipi i Salihit i ka larë duart tashmë.
Ky mund të jetë një peng për sulmuesin, pasi me 34 vite në supe vitet në futboll i ka të numëruara. Shkodrani po mendon për të ardhmen dhe nuk e di nëse do të vazhdoj të jetë pjesë e këtij ekipi, apo do të tentojë më lart.
Salihi e dashuron futbollin dhe kjo është dhe arsyeja se pse po luan akoma dhe në këtë moshë. Shkodrani ka një karrierë të kompletuar, pasi ka fituar gjithçka në kampionatin shqiptar.
Ai ka dy kampionate, me Tiranën në sezonin 2005-06 dhe Skënderbeun në sezonin 2015-16. Ka arritur të ngrejë lart dy kampionate të Austrise me Rapid Vienna.
Ka fituar 1 kupë me Tiranën 2005-06, ndërsa ka 2 superkupa të Shqipërisë me Tiranën dhe një në Kinë me ekipin e Jiangsu Suning. Ai ka luajtur në Amerikë, por ka eksperiencë dhe në kampionatin izraelit.
