Dani Alves tha se do të kthehej te Barcelona që nesër, nëse gjigantët e La Liga-s do ta kontaktonin atë. Braziliani Alves u largua nga Barcelona për kampionët italianë të Juventusit në vitin 2016, pasi fitoi 23 tituj në “Camp Nou”.
Alves u bashkua me PSG-në e Ligue 1 në vitin 2017, por 34-vjeçari refuzoi të përjashtojë një rikthim te Barcelona, pavarësisht nga rrethanat e largimit të tij. “Barcelona është shtëpia ime, – tha ai për “Globo TV”. – Është e pamundur të thuash që nuk do të kthehesha. Unë do të kthehesha që nesër, nëse Barcelona do të më thërriste”.
Alves, i cili e ka ndihmuar PSG-në të fitojë titullin në Ligue 1 dhe “Coupe de la Ligue”, e ka shijuar këtë sezon, ndërsa kampionët francezë kërkojnë një tripletë të brendshme. Ai shtoi: “Nëse do të thosha se nuk e lashë Barcelonën me ndjenjë të lënduar, atëherë do të gënjeja. U largova pikërisht nga lëndimi, sepse mendoj se kam luftuar shumë për të krijuar një histori të shkëlqyer në Barcelonë. Kam lënë 23 tituj në 8 vite.
Përfundova duke u dhënë atyre rezultatet më të mëdha dhe pastaj nuk e respektuan historinë time. Drejtuesit katalanas donin që të kisha një lamtumirë, por u thashë jo, sepse e konsideroj atë vend shtëpinë time të përjetshme. Dhe kur një vend konsiderohet shtëpia jote, nuk duhet të thuash lamtumirë. Çfarë kuptimi ka lamtumira, nëse do të kthehesh?”
