Nga Boldnews.al
Edi Rama po tenton të kanalizojë kritikat e politikanit të rëndësishëm gjerman, Gunther Krichbaum tek individi, në tentativë për t’iu shmangur përgjegjësive të qeverisë së tij mbi ngecjen e reformave në Shqipëri.
Mediat pranë Ramës kanë nisur një sulm kundër Krischbaum. Por kryeministri po harxhon energji për t’i shpjeguar publikut se ai nuk ka orientuar asnjë sulm ndaj deputetit gjerman, njeri shumë pranë kancelares Angela Merkel dhe zyrtari më i rëndësishëm për zgjerimin e Bashkimit Europian në Bundestag.
Në një debat të stisur, ku synon të përfshijë edhe kreun e Partisë Demokratike, Lulëzim Basha, mbi individin Gunther Krichbaum, kryeministri i shmanget qëllimisht shqetësimeve që ai ka në lidhje me zhvillimin e vendit tonë.
Krichbaum deklaroi pak ditë më parë se, para se të vendoset për hapjen e negociatave me Shqipërisë, Bundestagu gjerman do të marrë në shqyrtim edhe raporte të ndryshme, si Transparency International apo të Bankës Botërore.
Këtu qëndron problemi i Edi Ramës. Ai e di shumë mirë, siç tashmë e di edhe publiku, që këto organizma ndërkombëtare të cilat do t’i referohen parlamentarët gjermanë, nuk janë më të mirët e mundshëm për qeverinë “Rama”.
Transparency International, në raportin e tij më të fundit, publikuar në Shkurt 2018, e renditi Shqipërinë në vend të 91-të mes 180 vendeve, me një rënie prej tetë vendesh që prej vitit 2016. Shqipëria shënoi 38 nga 100 pikë gjithsej.
Në prezantimin e këtij raporti, kreu i Prezencës së OSBE në Shqipëri, Bernd Borchard u shpreh se “fenomeni i korrupsionit në vend vazhdon të përbëjë shqetësim serioz,” Ai u shpreh më tej se “u bëjmë thirrje institucioneve publike dhe organeve ligjzbatuese në Shqipëri të vazhdojnë me zbatimin e reformave në drejtësi dhe reformave kundër korrupsionit në përputhje me rekomandimet dhe detyrimet ndërkombëtare të Konventës së Kombeve të Bashkuara kundër Korrupsionit”.
Pra, duket qartë se Transparency International i ka dhënë një karton të kuq Edi Ramës lidhur me luftën e dobët kundër korrupsionit.
Banka Botërore, në raportin e saj publikuar në nëntor 2017, deklaroi se “Rritja ekonomike e Shqipërisë do të ulet për shkak të përfundimit të dy projekteve të mëdha në fushën e energjisë, gazsjellësit Transadriatik dhe Kaskadës së Devollit, ndërkohë që nuk ka asnjë investim tjetër të madh në horizont që mund të zëvendësojë efektin e tyre,” deklaroi BB.
Pra, edhe në aspektin ekonomik, qeveria shqiptare duket se nuk do të marrë asnjë dritë jeshile nga Këshilli Europian, duke konsideruar këtu faktin që Bundestagu gjerman do t’i referohet edhe këtij raporti lidhur me diskutimet për hapjen ose jo të negociatave me Shqipërinë.
Është e qartë se Edi Rama, në luftën e tij të stisur kundër individid Gunther Krichbaum, synon që të zhvlerësojë kritikat e tij, ndoshta në përpjekjen për t’i hedhur hi syve publikut shqiptar se ai e ka personale me kryeministrin e Shqipërisë. Një përpjekje, e cila duket më shumë se sa qesharake.
