Të gjithë ata që mendojnë të marrin një kredi, për biznes apo blerje shtëpie do të përballen, jo vetëm me më shumë kushte për të plotësuar, por edhe me interesa më të larta.
Banka e Shqipërisë konstaton në Vrojtimin e Aktivitetit Kreditues për tremujorin e parë të këtij viti se situata e përgjithshme e kreditimit, që në këtë periudhë nuk ka qenë nga më të mirat, do të vijojë të jetë e shtrënguar edhe për muajt prill-qershor.
“Në tremujorin e dytë të vitit 2018, bankat presin një ngadalësim të aktivitetit kreditues, si në monedhën vendase ashtu edhe atë të huaj.
Për të njëjtin tremujor, normat e interesit të kredisë priten më të larta, si në lekë ashtu edhe në valutë”, theksohet në Vrojtimin e BSH-së.
Edhe gjatë tremujorit të parë të këtij viti, bankat u treguan të tërhequra në kreditimin e bizneseve dhe individëve. Sipas Bankë Qendore, faktorët që kanë ndikuar në shtrëngimin e standardeve dhënë bizneseve kanë qenë problemet specifike të sektorit, mjaftueshmëria e kapitalit, situata e perceptuar makroekonomike, si dhe huatë me probleme.
Përsa u përket individëve, faktorët ndikuan negativisht në shtrëngimin e dhënies së huave ishin gjendja financiare e individëve dhe zhvillimet në tregun e pasurive të patundshme.
