Raporti i Departamentit Amerikan të Shtetit mbi të drejtat e njeriut i ka cilësuar Kinën, Rusinë, Iranin dhe Korenë e Veriut si forca të destabilitetit, pasi qeveritë e këtyre vendeve abuzojnë çdo ditë me të drejtat e njeriut. Ndërkohë në rajonin e Ballkanit Perëndimor, raporti veçon nivelin e lartë të korrupsionit si problematikën më të rëndë.
Qeveritë e Rusisë, Iranit, Kinës dhe Koresë së Veriut janë etiketuar nga Departamenti Amerikan i Shtetit si “moralisht të dënueshme” për shkak të shkeljes flagrante së të drejtave të njeriut, gjë që i bën ato “forca të destabilitetit”.
Kështu shkruhet në raportin mbi praktikat e të drejtave të njeriut për 2017, publikuar nga DASH.
Raporti vlerëson se këto qeveri nuk ia kanë dalë të ndërmarrin hapat e duhura për të ndëshkuar apo ndjekur personat që kryejnë abuzime, gjë që rezulton në një klimë mosndëshkimi.
Vëzhgimet, sidomos sa i përket situatës në Rusi, bien në kontrast me retorikën pajtuese që presidenti Donald Trump ka përdorur kundrejt Moskës. Të njëjtat vlerësime shkojnë edhe për qeveritë në Turqi, Siri, Venezuelë dhe Mianmar.
Duke ardhur më pranë rajonit, vëmendja kryesore duket se përqëndrohet në problematika të tjera siç është korrupsioni.
Raporti i Departamentit të Shtetit vlerëson se në Kosovë, korrupsioni vijon të mbetet problem serioz pasi Qeveria nuk zbaton ligjin që parashikon dënime penale për zyrtarët e korruptuar.
Edhe Maqedonia përballet me një sërë problemesh përfshi torturën nga rojat e burgjeve, ndërhyrjet e privatësisë, dhuna ndaj gazetarëve, mungesa e pavarësisë së gjyqësorit, korrupsioni.
Raporti i Departamentit të Shtetit konsiderohet si pasqyrimi më i plotë i situatës globale të të drejtave të njeriut, pasi mbulon rreth 200 vende dhe territore.
Ky raport nuk përfshin krahasime apo renditje të vendeve që merren në studim.
Publikimi i këtij dokumenti vjen në një kohë kur i emëruari i presidentit Donald Trump për sekretar shteti, Mike Pompeo, pret konfirmimin në këtë detyrë.
