Qeveria ka gjetur zgjidhje me kompaninë Bankers Petrolium për lëkundjet në Zharrës. Ministri i Infrastrukturës dhe Energjisë, Damian Gjiknuri deklaroi se ajo do të paguajë kontributin e saj për riparimin e një pjese të dëmeve të shkaktuara nga lëkundjet.
“Është biseduar me Bankers dhe është arritur dakordësia që edhe ata të japin pjesën e tyre të kontributit. Do të krijohet ai fond si kontribut që do të dorëzohet tek Emergjencat Civile. Pjesa e parë të fondit është dhënë nga qeveria dhe tanimë do mund të akordohet dhe pjesa e dytë.
Gjithsesi, do të bëhen verifikimet që të sigurohemi që këto para shkojnë për merimetimin e shtëpive dhe jo këto para i marrin i shpenzojnë dhe më pas thonë shtëpinë e kam të dëmtuar. Pra, paratë do të shkojnë për të rindërtuar shtëpitë e dëmtuara aty. Ky do të jetë procesi që do të bëhet verifikimi.
Paratë do të kalojnë në Buxhetin e Shtetit por do të disbursohen në bazë të verifikimeve që do të bëjnë ekipet në terren”, sqaroi Gjiknuri.
Ministri bëri të ditur gjithashtu, se po bisedohet me kompaninë që të ketë dhe një policë sigurimi, e cila të japë zgjidhje edhe situatave eventuale pa rënduar buxhetin e shtetit.
“Nga ana tjetër, për të ardhmen, jemi në diskutime me kompaninë që të bëjë dhe një policë sigurimi që në çdo rast, sikur të ketë situata të tilla sizmike, pavarësisht se ne i kemi pezulluar proceset aty, fondi financiar të jetë nga kompanitë e sigurimit dhe qytetarët të mos paguajnë asgjë pasi do jetë kompania që do të derdhë në këtë fond sigurimi.
Kjo në mënyrë që edhe aktiviteti të vazhdojë por dhe që impakti ekonomik të mos rëndojë më tek buxheti i shtetit ndërsa qytetarët të jenë të siguruar për çdo eventualitet”, u shpreh Gjiknuri.
Kreu i Infrastrukturës dhe Energjisë i bëri këto deklarata gjatë një takimi me naftëtarët, ku shpërndau për disa prej tyre dëshminë e Statusit të Naftëtarit.
