Komisioni i Disiplinës është mbledhur dhe ka marrë vendime për parregullsitë e shfaqura në ndeshjet gjysmëfinale të Kupës së Shqipërisë. Ndriçim Shtubina i Laçit, i cili pas ndeshjes ka ngritur bluzën duke treguar emrin e tij, e ka pësuar, duke u dënuar me dy ndeshje, edhe pse ai vetë është shprehur se nuk është normale se u ndëshkua me karton të kuq, pasi atë festim e bëjnë në të gjithë botën dhe lojtarë si Messi e Ronaldo.
“Doja t’u tregoja dy djemve të mi se çfarë bën babai i tyre. Nuk ishin në tribunë, por e dija se po më ndiqnin nga televizori. Unë për ta luaj futboll dhe e ngrita bluzën për ta. E bëjnë futbollistët më të mëdhenj këtë gjë, por unë çuditërisht u ndëshkova me karton të kuq”, pat thënë Shtubina. Gjithsesi gjysma e së keqes: shkodrani mund të luajë në finalen e Kupës së Shqipërisë, pasi dënimin do ta shlyejë në kampionat, duke nisur nga sfida e nesërme në kampionat me Kukësin.
Edhe verilindorët janë dënuar për shkak të sjelljes së tifozëve, që nuk i kanë kursyer shishet e hedhura në fushën e lojës, çka ka bërë që Kukësi në ndeshjen me Lushnjën ta luajë pa praninë e publikut. Objekt diskutimi në Komisionin e Disiplinës ka qenë edhe Flamurtari, por këtë herë vlonjatët kanë shpëtuar vetëm me një paralajmërim.